03‏/07‏/2009

عبد الله بن عبد العزيز العيفان (2)

زياد الرحباني

الأخبار عدد الجمعة ٣ تموز ٢٠٠٩


2- "عيوني هالعيون!"
- عيسى: كان مبارح يا خيي مخايل، النايب "المُظفَّر" ــ العادي، أخونا وحبيبنا، الأستاذ هادي حبيش قاعد "مستَّت" عالتلفزيون بالنهار عبكرا مدري ضهريات يا خالو، وعم يشرِّح تشريح، ومصِرّ يشرّح موقفو كقوى 14 آذار يللي دايماً ثابتة بمواقفها إنتِ بتعرف.
- مخايل: مفهومة.
- عيسى: أهه، مصِرّ يشرّح وبدون ما يتلّي الجاكيت لأنّو الأستاذ هادي هوّي والجاكيت قصّة قديمة.
- مخايل: مرتّب هالزلمة.
- عيسى: إنتِ مش ضروري تحكي مُمكن؟ اسمعني شو عم قلّك بالأوّل.
- مخايل: (تأكيد) ما عم بسمع.
- عيسى: إي اسماع وخلّيني كفّي.
- مخايل: ماشي.
- عيسى: بقا، خيّك "هادي" مثل "معلّمو" ومثل اللي بيلهمو لمعلّمو، مارق هلّق بكوع كبير، ذاكر كوع الكحالة؟
- مخايل: إي.
- عيسى: إي هاي تكويعة مطلوبة حالياً، لا كوع الكحالة ولا لفتة ضهر الوحش، ولا شي قدّام الزنقة اللي مزنوقينها جماعة "حكيم ويلّله ـ سوريا إطلعي برّا!" سبحان الله، ما هيّي البهدلة بالسياسة وبقيادة الشعوب كيف بتصير؟ إنتِ عارف؟
- مخايل: يعني مش قدّك اسما الله عليك.
- عيسى: البهدلة يا معلّم بتصير أوّل شي، كلّ مرّة نفس الشي وتانياً: بتصير كل مرّة مع نفس الناس، هاي الطبيعة شو بدّك، مسَهّلِتلَكْ إياها، شو بدّك أحلى من إنّو سعادة النايب حبيش، وعا فكرة سعادة لا توصف، عم بيكيّل تلميحات بتشبه التهديد لإسرائيل، كَونو كوّع كوع الكحالة وصار مع "المقاومة" ومع "توازن الرعب" انتبه! ونحنا اللي ما كِنّا فهمانين عليه. إي طبعاً، إنّو نحنا كيف بدّك إيانا نفهم، ما نحنا 8 آذار، كيف معقول واحد بـ 8 آذار يكون بيفهم، أكيد ما بيفهم بدليل إنّو: بدّو يدمّر البلد بحسب ما كلَّفِتو الجمهورية الإسلامية الإيرانية. إي هيدي الإشيا وغيرها، هادي حبيش ما بيقدر يوقف إلا ضدّها. يعني ضد سياسة «المحور الإيراني ـ السوري» الشهير، بس مع الفرق إنّو هالمحور هلّق ما بعرف شو صار فيه من بعد ما قرّرت أميركا وطلبت من «بني سعود» إنو يقرّروا هنّي كمان إنّو سوريا صحيح بهالمحور، بس ما عادت فيه؟! ورح تكون وَصلِة عبد الله بن عبد العزيز عيفان من كوريا الجنوبية دغري شَكّ عالشام كأول سفير بسوريا من بعد أربع سنين يا رَجُل، هيي الشغلة اللي بيستعملوها الأميركان علناً وأقوى من الـ«دير جنرال» (Der General)! يعني شو هلّق؟ راح المحور السوري ـ الإيراني اللي خيَّك هادي كلّ حياتو ضدّو وبشراسة بلغت حدود الـ78450 صوت بالعكّار، وهاي هلّق طازة، مش من كتير زمان.
هلّق شو العمل؟ هلّق الاستاذ هادي حبيش، هوّي أو غيرو يعني مِنِ الخلّ اللي منّو وفيه، بدّهن يتحولوا على التشريح والتوضيح، شو بدهن عالمظبوط من المقاومة لَمَا يرجعوا يزعلوا منها؟
(مخاطباً هادي)
وصّينا خيي هادي، شو بعد عندك هيك شي ملاحظات عالمقاومة أو للمقاومة، شو ناقصك قِطَع، أكسسوارات لعمل مقاومة شيعية صحيح، بس حضارية، مقاومة لبنانية، سيّدة حرّة مستقلّة. يعني إنّو فيها كل مواصفات 14 آذار بس صارت بـ 8. هيدا الشي صعب، هوّي صعب خيّي هادي بس نحنا؟ نحنا طلباتك أوامر وبِتمون... عيوني هالعيون!


02‏/07‏/2009

نَحَــوي

زياد الرحباني

الأخبار عدد الخميس ٢ تموز ٢٠٠٩


(نَحَوي) ورد في مقالة البارحة خطأ في التقسيم والعنونة، ومردُّه، تصادف غياب بعض الأشخاص المساهمين عادةً في إيصال المقالة إلى الطباعة ومنها إلى القارئ. وهو غياب بالطبع لدواعٍ شخصية إنما بطبيعة الحال طارئة وضرورية وخاصة في صحيفة خطها وطني حر لا تشوبه عادة أية شائبة... عادةً... أي أن البارحة كانت استثناءً من سيل مريع من الاستثناءات لكن/ (دارج) ما بيأثر (دارج وبيروتي) بما إنو المقالة مبارح كانت عن بيروت وتحديداً راس بيروت. والصحيح بخصوص مقالة مبارح كان على الشكل التالي:
العنوان: عبد الله بن عبد العزيز العيفان (*)
1 ــــ بين «بربر» وثكنة «بربر خازن» والفجر (موضوع مستقلّ)
2 ــــ «عيوني هالعيون» (موضوع مستقلّ)
(نَحَوي) فاقتضى التصويب، وخاصّة أنّ المقال المعنون كَكُلّ: «عبد الله بن عبد العزيز العيفان» هُوَ موضوع الساعة، فقد بدأ البارحة وسيتبع غداً بإذنه تعالى.

■ أغنية للانتشار العسكري المزمن المتكرّر

(دارج)
بلا ملبّس بلا رزّ
وكل ما تعودوا تفوتوا
كل بيروت تفزّ
لا تفوتوا ولا تطلعوا
خلّيكن في بيروت
منّو الشَّعِب مَعْكُن
وصابر عم بيكِزْ

■ ■ ■

بلا ملبّس بلا رزّ
إنتو لْعَمْ بِتْمُوتوا
وهاي شغلة بِتْعِزّ
ما في لزوم تْمُوتوا
كل واحد هاي بيروتو
وطالما الشَّعِب مَعْكُن
مَعْكُن كل العزّ
ملاحظة: (نَحَوي) إذا أحبّت مديرية التوجيه التابعة لقيادة الجيش تلحين هذه الأنشودة العفوية، الرجاء منها أن تتّصل بي على جريدة «الأخبار» للقيام بالترتيبات الأمنية اللازمة لتسجيلها دون أي استنفار سنّي ــــ شيعي تابع لهذه الفتنة "الملعونة" التي حلّت بالطائفتين الكريمتين، وخاصةً أنّ للأغنية موّالاً في البداية عن القائد الواعد الجاهز العماد جان قهوجي.
ــ شكراً ــ


01‏/07‏/2009

عبد الله بن عبد العزيز العيفان (*) بين «بربر» وثكنة «بربر خازن» والفجر

زياد الرحباني

الأخبار عدد الاربعاء ١ تموز ٢٠٠٩


عيسى: لسوء الحظ أو لحسنو ما قادر إجزم، إنما في اشياء بيصير الإنسان ـ المواطن قادر يحصرها مع الوقت، خاصة إذا بتقعّدُو دولتو وجمعية حماية المستهلك ونقابة الفنانين والرقاصات والبَجَع! فترات قسرية بالبيت بحجة إنّو المستوى الفني العام متدهور كتير وهالنقابة أول مين عم بيعاني والأساتذة أنطوان كرباج وإحسان صادق هني أكتر تنين عم بيعانوا وعم يحاولوا يكافحوا الانحدار خلال النهار إنما الامكانات محدودة والدولة، نكاية فيهن يمكن، بتضل مقصّرة ومستلشقة، فـ... بيحاولوا بالنهار من خلال نقاباتهن الكتيرة اللي ما بتتوحّد يا شيخ وهني خوتانين طبعاً كمان من هالقصة وبعبّروا عن قرفهن بالليل بالبرامج التلفزيونية الهابطة كمان والمسرحيات اللي مدري ليش وحدها نافدة من هالهبوط بعكس حركة التاريخ!! .. ليس...
في اشياء اذن، متل ما ذكرنا، بيصير المواطن عالبطالة الموسمية والقعود، تنحصر معو الاشيا اللي بتحصل، ما بيروت صغيرة، وطبعاً أنا عم إحكي بالنهاية عن حالي وعن خبرتي بهالموضوع. صرت فيني أكدِلكُن مثلاً، شو هوي الوقت النموذجي لسرقة نوع من السيارات أو لزرع العبوات أو رمي القنابل، واللي هوّي تقريباً ذاتو، وهيدا شي ممتاز (المفروض) للجهات المتعددة خارج مؤسسة الجيش اللبناني، السهرانة عالأمن، أي بس لأيا ساعة؟! هون... والنوم طبعاً ودايماً سلطان، الوقت هوي يا إخواتي وعا مسؤوليتي، أو A: من التلاتة ونص وخمسة للأربعة إلا تلت، أو B: اربعة ونصف إلا خمسة للأربعة ونص وخمسة، خمسة إلا تلت مكسيموم لأنو بعد هيك ممكن يتعرض الجاني او المخطط لأي جناية من اللي ذكرناهن، لكبسات أو مفاجآت من قبل عمال توزيع الصحف اللي بيتجمعوا قبل الانطلاق حد ليبانون تاكسي ومعتوق للمعجنات حد مبنى جريدة "النهار" القديم، ليه هالوقت؟ بسيطة كتير لأنو هيدا الوقت بيسقط قبل أذان الفجر مع كل التغييرات الفصلية بتوقيتو واللي بتتلاعب بين: الساعة 3،50 (أربعة إلا عشرة) والـ4,15 (أربعة وربع) وبعد فلول آخر دوريات قوى «القمح الداخلي» الراجعين تلفانين من هالمواطنين الفاسدين والكذابين ومرقوا ينسوا تعبهن عند «بربر» بالفرعين: حمرا وسبيرز، قبل ما يسرّبوا على ثكنة «بربر خازن» بمنطقة معروفة بس سرية تابعة بشكل أو بآخر لشارع فردان. إي والله!
بتعرفوا مثلاً ؟ شو الوقت النموذجي لتفوت فيك، دورية صباحية مبكرة لشرطة سير بيروت إنت وصافف سيارتك تحت بيتك ونايم ربما او هيك بتتمنى ويطلع العنصر (معاون أو معاون أول) اللي كان هوي سايق الجيب الإسباني الحديث وتفتحلو ليقلّك: صباح الخير، فتنا فيك استاذ، بتحب تنزل معنا تشوف الضربة؟! وشو الوقت النموذجي مثلاً من بعد ما تلبس تيابك دَرْكبة وتنزل معو، ليطلب منك ظابط الدورية انو: «بلكي استاذ منطلبلك العميد نبيل مرعي، قائد شرطة بيروت، وبتقللو انو انتِ معقول تسقط حقك عن العنصر يللي كان سايق وفات فيك، لأن إذا ما عملنا هالاتصال معقول يحبسوه جمعة لعشرة أيام، وحضرتك بتعرف إنو ما بتطلع إلا براس المعتّر!! فخلينا نطلبلك العميد وهاي المعاون ما رح ينسالك إياها (وفيك تكفي: وبوعدك إنو من هالصبحية وبالرايح - يعني نسينا نقللكن يا اخواتي وقت الصبحية النموذجي : الساعة سبعة وخمسة عابكرا- إي فـ: «من هالصبحية وبالرايح بيوعدك المعاون انو كيف ما كبس أو شفط أو كوّع ومهما كانت المهمة اللي ضاهر فيها، ما بقا ممكن يفوت فيك ولا مرة، صدقني! هاي غلطة، أنا عم بعترفلك، إمضيلي هون بس. المحضر مضطرين نعمل محضر لأنو»).!!
هلّق، متل ما في اوقات كتير محددة بتصير تبيّن وتنحصر مع الوقت، في مناطق ضمن بيروت بتنطبق عليها نفس المواصفات، منطقة راس بيروت على سبيل المثال، شو بدك! لذة راس بيروت، إنو بكل مراحل الحرب، من الخطف عالهوية للاجتياح بالـ82 لحرب الجبل لمعارك «أمل» والاشتراكية ـ لحرب التحرير لحرب الإلغاء لوصول الحريري لاتفاق نيسان بالـ96 للتحرير بالـ2000 لـ11 أيلول ومبنى التجارة العالمي تصوّر، لحرب العراق الثانية بالـ2003 لاستشهاد رفيق الحريري لانسحاب القوات السورية هيّي ومؤتمر الطائف لعدوان تموز لاعتصام المعارضة من 2007 لـ7 أيار السنة الماضية، ظلّت منطقة راس بيروت سبحان الله، منطقة نموذجيّة للعيش المشترك، لوجّ لبنان الحقيقي اللي كل السواح والاجانب بيقصدوه بس يفكروا يجوا عا بيروت، وهالشي مردّو إنو شو في ملّة معقول تخطر عا راسك كلها بتلاقيها موجودة براس بيروت.
مخايل: إي مظبوط يعني إنو مش سُنَّة عالحَّل.
عيسى: اي طبعا، ما شو بيجيب الكويتية والسعودية لكن؟.
■ ■ ■
2 «عيوني هالعيون»!؟
عيسى: كان مبارح، النايب المظفر الاستاذ هادي حبيش مستقبلينو عالتلفزيون بالنهار عا بكرا يا خالو... (يتبع).
(*) يتبع أيضاً ـ يتبع هادي حبيش أو العكس صحيح.


27‏/06‏/2009

من مدينة همبورغ [3]

زياد الرحباني

الأخبار عدد السبت ٢٧ حزيران ٢٠٠٩


- عيسى: (بهمبورغ، واقف بالصفّ ليشتري تلات علب دخّان، مخايل وراه). ما بتحكي إنكليزي. الصبيّة اللي حدّا، ممكن، بس الختيارة أكيد ما بتحكي.
- مخايل: إيه بس عم قلّك أنا مبارح حكيتها بالانكليزي وجاوبتني.
- عيسى: هيدي الختيارة؟ ولّا غيرها؟
- مخايل: هيّي إيه.
- عيسى: غريب، هلّق سألها العراقي اللي اشترى وضهر Do you speak English? قالتلو no English ـ ودلّتو عالصبية اللي عم قلّك عنها.
- مخايل: إيه بس أنا حكيتني إنكليزي عم قلّك.
- عيسى: كيف؟ متل كيف؟
- مخايل: عم بسألها Do you English?
- عيسى: Do you English?!
- مخايل: إنّو إيه متل ما قلّها العراقي.
- عيسى: (صحّحلو) Do you speak English?
- مخايل: إيه الذي هُوَ، إيه جاوبتني No English
- عيسى: مَ عم بقلّك ما بتحكي إنكليزي، مَ هيّي عم بتقلّك.
- مخايل: فهمان، بس كيف عرفِت شو سألتها لو ما بتعرف إنكليزي؟
- عيسى: روح يا... (الصفّ واقف متل ما هوّي)
- مخايل: (بعد تفكير) هيّي ما بدّها تحكي معو لأنّو عربي، هيّي بتعرف بس ما بدّها تحكي معنا لأنو عرب.
- عيسى: أكيد عرب إذا ?Do you English. عرب كتير!!!

■ ■ ■

- عيسى: شو هوّي أكبر سرّ بالعالم، غير أسرار الآلهة وأسرار الطبيعة؟
- مخايل: أكبر من أسرار الآلهة؟!
- عيسى: معلوم.
- مخايل: في أسرار كتير بالعالم.
- عيسى: (بعزم) لا ما في أسرار كتير. انا رح هوّنلك ياها، منّو سرّ التوبة ولا سرّ "التثبيت".
- مخايل: التثبيت؟!
- عيسى: طبعاً، ولا سرّ العماد.
- مخايل: "عون" يعني؟
- عيسى: العْمَاد، العْمَاد، المعمودية يعني.
- مخايل: آه المعمودية إلها سرّ؟
- عيسى: شي أكيد، هيّي سرّ! ولا سرّ "الأفخارستية"، سامع فيّا هي؟
- مخايل: لاه.
- عيسى: إيه، ولا سرّ الزواج ولا سرّ الكهنوت.
- مخايل: أوف أكبر من سرّ الكهنوت؟!
- عيسى: طبعاً.
- مخايل: العمى شو هوّي هالسرّ هيدا؟
- عيسى: سعر الكلفة.
- مخايل: أها... أكيد؟
- عيسى: إيه أكيد، إعرفلي سعر الكلفة إذا فيك، ولا يمكن، هيدا سرّ ركّبوه "الشرّيرين" لما يعرفوه الأوادم ولا يقدروا يطالبوا بزودة، وإذا طالبوا، ما يعرفوا قدّي إلهن حقّ يطالبوا لأنهن ما بيعرفوا سعر الكلفة.
- مخايل: آه... بس "الشرّيرين" بيعرفوه يعني؟
- عيسى: إلمفروض، بس ما كتير / آخر همومهن، وأوقات بينسوه كمان، إيه شو هنّي اللي عم بيشتغلوا بمعاش ثابت؟! هولي ما بيطيقوا شي ثابت، من هيك بيفضّلوا ينسوه ويتذكّروا بس وبشكل غامض، إنّو هوّي كتير عالي.
- مخايل: شو هوّي؟
- عيسى: سعر الكلفة خيّي.


25‏/06‏/2009

الجنّة، مخابرات (2/2)

زياد الرحباني

الأخبار عدد الخميس ٢٥ حزيران ٢٠٠٩


هلّق أكيد إنّو التاريخ والتراث العربي متل ما هوّي غني بالأدب والشعر وغني بالعلوم والأبحاث، ومتل ما هوّي موصوف بالعزّة والشهامة والكرم، معروف كمان بالأقوال الشعبية وخاصة الأمتال. وأمتال العرب ناتجة عن الوجدان والحكمة عموماً. وبْصرّ على كلمة: عموماً. ليه؟ لأنو في شي منها كتير موفَّق وصحيح وفي شي لأ، مين قال مثلاً إنّو «مَن راقب الناس مات همّاً»؟.. هاي مظبوطة يا ترى؟ طيّب إذا مظبوطة، كان يفترض كل سنة سنتين، تفقد الدولة معظم عناصر مخابراتها! وطبعاً الأولويّة للأقدمين. وهيدا الشي مش حاصل أبداً، ما بحياتو حدث إنو واحد مخابرات توعَّك حتّى من ورا المراقبة، بالعكس أنا ملاحظهن كلّهن صحّة وعافية، مش بحاجة حتّى تدعيلهن لـ أللّه يعطيهن ايّاها(*). وبحوار قصير بيني وبين العلاّمة الأستاذ أنسي الحاج، أمَدَّ الله ظِلّه، صَحّحلي المتل وقلّي إنو برأيو: «مَن راقب الناس ماتوا همّاً»، وأكتر من هيك أنا بعرف وبذكر منيح إنو: «مَن راقب الناس، بقّوا دمّاً»، أو راحوا طَمّاً، المهم إنّن نقصوا كمّاً»...
أكيد إنو الأعرابي اللي طلع بهالمتل، قاعد مسترخي كاين تحت شي نخلة وعم بيراقب أعرابي تاني مدري وين قاعد عم يراقب الناس، اللي رايحين واللي جايين كل النهار ويهزّ براسو كل ما عملو شي ما عَجَبو ويتألّم بهالشوبات عا مصير العرب، عا مستقبل بني عبس قدّيش هوّي «قاتم»، بس بدون ما يتدخّل أو يعمل أيّا شي. إي، هيدا ممكن إنو بيوم من الأيام، إذا هيك مقضّيها، يموت همّاً. هيدا إذا ما راح بضربة شمس! بس المخابرات وين؟ المخابرات غير. المخابرات هيّي وعم بتراقب، بتكون ناطرة شي ما بيسوى، ما نحنا قلنا بالمقال السابق إنو سهرانين بيبقوا عالأمان والطمأنينة، عم يراقبوا في سبيل المعرفة! وجماعة ما بيطيقوا لا الغريب ولا المجهول. أي هولي ما بيراقبوا بس، بيراقبوا وبيعالجوا، بيراقبوا وبيخبّروا، وإذا ما كان في وقت كافي ليخبّروا، بيطرقوك «بوكس» على أسنانك، وبتلمّهن لمّاً... أي لكن؟
(*) العافية.


24‏/06‏/2009

الجنّة، مخابرات (1/2)

زياد الرحباني

الأخبار عدد الاربعاء ٢٤ حزيران ٢٠٠٩


أنا، وبكل تجرّد، ولا مرّة فهمت ليش عموم الناس بيكرهوا المخابرات لهالدرجة، كل أنواع المخابرات. أنا بحسّ بالعكس عنهن لهالناس. أنا بحسّ بالعكس تماماً. أنا بحسّ وجربوا تفهموني، أنا بحسّ أنو شغلة المخابرات، شغلة بتوّدي بالنهاية النهاية، عالإلفة، عالطمأنينة الشاملة، الشخصية والإجتماعية.
ما في! بتمرق مرّة على حاجز مخابرات، جوّات البلد أو عالحدود !Whatever، خَلص بيمشي الحال، المشوار اللي بعدو، إذا صرلك مشوار تاني، بيقولولك عالحاجز وقبل ما تسحب الهوية: اهلا استاذ نضال!(إذا اسمك نضال شي اكيد) أي هاي شو فيها غلط؟ مفروض بتطمّن؟ اكيد! بتعرف حالك وين رايح او لوين فايت وإنّو منّك غريب، بتعرف وبتحسّ انو العين عليك شو ما صار معك. طيب هيدا الشي ما بيودّي عالطمأنينة؟! وطمأنينة للطرفين. وانا برأيي هيك بيبلّش ينبنى ويعمّ الامن الإجتماعي، أمنك، أمن مرتك وولادك، أمن أصحابك حتّى، في أحلى منها؟ نظام عام ما عندو شي إسمو: مجهول. ليك؟ الإنسان عدوّ شو عامة؟ عدو ما يجهلو، مظبوط؟ أي إذا ما عاد في شي بيجهلو، شو بيصير؟ المدينة الفاضلة!... يسْلَم تمّك.
(يتبع غداً)


16‏/06‏/2009

عقاب صقر 49238 !!! (النهاية)

زياد الرحباني

الأخبار عدد الثلاثاء ١٦ حزيران ٢٠٠٩


كل الدواير الانتخابية عالمساحة اللبنانية كانت بمحل والعكار وحدها بمحل تاني... وهون الجو ما في أخد وعطا، ما في مزحة بتنمزح بين تنين قاعدين بقهوة، ما في احتمال للفُكاهَة، ما في مزح بالعربي المشبرح. لأنو بالعكار كان الجو صافي وعالمشبرح... صحيح نسبة الاقتراع 53 بالمية ومنيح اللي ما انتخبوا كلهن، لأنو بـ53 بالمية بس، قادر هادي حبيش الله يهديه يجيب 78450 صوت، وهيدا شي كاسح، ومش هون الخوف، الأخ هادي بينزل عاقريطم من وقت لوقت بيمرق عا حواجز جيش يعني، مش إنو بيحبو وبيموت فيه من بعيد لبعيد، بس في عندك المُلا خالد ضاهر اللي حُبّو للجيش كمان قوي بس عُذري، ومش بس عذري، عذري ومعظم الأحيان جُوّاني يعني ما بيصرّح فيه إلا بالمناسبات، يعني بس تنفجر شي بوسطة أو «فيسبا» بمجموعة عسكريين وج الصبح، ووين؟ عالساحل، عامداخل طرابلس من الجنوب والشمال. يعني الملا الخالد والملا خالد زهرمان، غير إنهن ضد «القاعدة» للموت، فازوا على ممثلي الدانمارك بالطوايف التانية، وانتصارهن بشي فوق الـ70 ألف صوت يا عالم، هوّي الضمانة إنو ما بقا حدا في العالم بيسترجي يرسم صورة أو كاريكاتور عن النبي صلى الله عليه وسلم! وهيدا شي بيريّح تيار المستقبل بالنتيجة لأنو التيار صحيح عندو قناة تلفزيونية فاحشة متل ما بدك ومتل ما العربان بيتمنوا، إنما هيدي القناة اللبنانية المدنية المسلمة المؤمنة بامتياز.. يعني صدّقني كل إعلان عن محل تياب نسواني أو فوطة صحية، البَعيد، أو عن عطر أو «كولان»، بتمرق عاتلفزيون المستقبل عامضض!! وهالرقاصات البيارتة كيف بيعملوا هيك حركات والكاميرات عم تصوّرهن من تحت، وهالشي ضروري لـ«الإخراج السليم»، المسؤولين عن المحطة ما بيعرفوا ولا بيقدروا يردعوهن لأنهن إلهن من الـ2005 بيسوّقوا إنهن بيحبّوا الحياة وإنو لبنان الحقيقي جاي، وسوليدير راجعة بأبهى حللها وشو أبهى حِلَلْها يا بابا؟ بدك تسأل مقرن بن عبد العزيز خوجا!!!
بسّ شي بيخوّف فعلاً، والحمد لله إنو العكار عاحدود مع سوريا، هاي متل ما إلها سيئات، أحياناً بوجود «الانفتاح الأصولي الجديد»، إلها حسنات... ما بتعرف يمكن يضطروا جيشين، لبناني وسوري يتعاونوا لَحَصْرو. وطبعاً بطلب من الوزير إيلي ماروني مقدَم للحكومة وذلك خوفاً على السياحة وخاصة السواح الأجانب من غير الدانماركيين. خسارة يعني، في ناس خسارة إنهن يربحوا، هلق صحيح اللي طلَّعهن خِسر كتير فلوس، بس هيدا بعد معو ومستعدّ يحطّ الغالي والرخيص والنادر والنفيس لمَا يسيطر حزب الله وحدو هوّي وحلفاؤه عالمجلس النيابي... يمكن في شي شوي بيطمّن إنو الأخ سعد الحريري دوماً بيوصّي عليهن يحبّوا الجيش وما ينسوا هالشي وإنهن ما يدعوا بصلواتهن على العسكريّة حتى لو كانوا من إخواننا الشيعة!
بسّ كيف ممكن تنحلّ قصة زحلة؟ هون السؤال الوحيد اللي حيَّر كل اللبنانيي. أساساً كيف صارت خسارة لايحة سكاف وكيف رح تقطع هالخبريّة العجيبة؟ برأيي ورأي الزحالنة، ما رح تقطع.
يا عمي، حدا بيزرع الفتنة مطرح ما الزرع بيطلع؟ حدا بيزرع الفتنة بالبقاع؟ حدا بيحصر نثر البدار ببلدة زحلة بالتحديد؟ إنو تجي تنقل نفوس حوالى سبع آلاف مخلوق سُنّي لتسقّط لايحة إلها، إن شئت أم أبيت، طابع مسيحي مشكّل، وتحمل حالك بهونيك نهار أحد بتاريخ 7/6/2009 وتمشي؟ لوين ماشي يا إبن ألله؟ لوين فكرك رايح؟ رايح تألّف حكومة وتناشد بالحوار وإنو أوعا هَه! ما في غيرو؟ إنو زرعت فتنة ومشيت؟ وإنو مين بدّو يحصد؟ ما هالزرع بدو يطلع، إن ما طلع هلّق، بكرا بأيلول، بأول شتوة، الأرض رح تتنفّس ورح يبلّش هالزرع يعلَى، إنو تارك الموسم لأهالي زحلة والمحيط؟ يا عمي ما هاي زحلة ولاه! هاي وادي العرايش، هاي عروسة البقاع، هاي البردوني، هاي مطرح ما الزرع بيطلع وحدو حتى لو المزارعين نايمين، هاي مربَى الأسودة، وإذا إنت ما بتاكل قصبة نيّة، هنّي بياكلوا، أي لشو جايب ملّة كبيرة لبنانية تانية تحركش فيهن، تحركش بربّهن إنتَ الصادق؟
ليك، إنو سليم دياب مختفي عال، والسيد فتفت... بلا تعليق. بكرا «أمن الدولة» بيقول اللي عندو، والحكيم كان محبوس لأسباب جوهرية ورجع فَلَت، وإنو فكركن هيك البلد رح تضلّ فالتة؟ بدكن ايّاها آمنة وفالتة، أي ما بتظبط، أبوك ألله يرحمو، كان فهمان منيح هالشي، كمان ألله يرحمو وميّة مرّة... ليك... هاي الأحلاف المختلطة الجديدة من بعد «ثورة الأرز» ما عاجبتكن، ما هيك؟ إنو شو هالتحالف بين الموارنة والشيعة، من أيمتا؟ بدكن ترجعوا للحرب الأهلية الأساسية، من أوّلها، يعني إسلام ــــ مسيحية، طبعاً لحتّالي يرجع مؤتمر الطائف عليه القدر والقيمة، ماشي... أي خود نتيجة... نتيجة، وينك؟ نتيجة غير النتيجة اللي أعلنها الوزير بارود تاني نهار الانتخابات، وليك اللي طلّع عُقاب صقر عالمجلس، هوّي بينزّلو...


13‏/06‏/2009

عقاب صقر 49238 !!! (تابع)

زياد الرحباني

الأخبار عدد السبت ١٣ حزيران ٢٠٠٩


... أساساً «الحكيم» ما بينلام إذا مبسوط بالنتايج الانتخابية، ما الحكيم مبسوط من سنة الـ2005 لأنّو شي جديد عليه، كل هالأشيا اللي صارت من الـ2005 لليوم جديدة وشايفها حلوة، من الحلف مع جنبلاط للرد عحزب الله، وخصوصي بينبسط بس يرد عـ«السيّد حسن». بعدين من استهداف المناطق الشرقية بالعبوات الليلية لمصرع بيار أمين الجميل لسمير قصير، قول هيدا الله يرحمو ما كتير كان بيعرفو بس سأل الست ستريدا عنّو، كمان ما عرفِتْ، فسألوا آخر شي إيلي كيروز، قلّهن «هيدا كان معنا بساحة الحرية وشايفو قبل»، بعدين «الحكيم» صار بدّو ينزّل إميل لحود قبل نهاية ولايتو وحسّ إنو الجوّ حلو، السوريين ضهروا بهالسرعة، هات لنطلع عا بعبدا، هات لنتشكّى عا بيار الضاهر وناخد محطة الـLBC بفرد مرّة. شوي وليد عيدو من هون، أنطوان غانم من هونيك، حسّ برنامجو فجأةً اتعبّى وصار لازم يعطي رأيو برئيس الجمهورية الجديد فركّز هوي ومدامتو عا إيد البطرك وعالصلا والصوم وعالمسيحيين الأصليين بفرد مرّة! وانعزم آخر شي عا مؤتمر الدوحة، أي ما صدّق أكيد! طاير من البسط لأنّو بالنهاية طلِع من الحبس بدون ما يكفّي فترة حكمو وعِلِق يزرّك لكل اللي كانوا هنّي مبسوطين بحبسو. صار بدّو يعلِّم بيت كرامي كيف بيردّوا عليه إذا بدهن يردوا... هيِّن الحكيم فِكرك؟
صراحة بيحتار الواحد بمين بدو ينبسط أكتر، بـ«الحكيم» ولاّ بنايلة التويني؟ هه! هاي نواب! هاي شباب، هاي «نهار الشباب» كلّو يَطّأ عند «برّي»!!
صار رئيس المجلس الحالي والقادم بإذن الله، عندو «ستريدا دوميلانو» و«نفرتيتو»، مش «تي»، «تو»، لأنّو منخار السيدة تويني جاي بَرم، ومش مأثّر عالجاذبيّة فما بيأثّر... اللي بيأثّر هوّي رجْعِة جان أوغاسبيان، أنا مثلاً بتأثّر بهيك أشيا، صراحة ما بدنا ننتهي بالمحاكم بدعوى من أوغاسبيان عا جريدة «الأخبار» ورئيس تحريرها اللي بدّو خبرية بالناقص، بس أوغاسبيان القوي جداً بالتحنيط والتصبير واصل لصيغة لغة لا عربية ولا أرمنية ولا نحوية، شوفوا شو بدكن تعملوا، ولغة بعدها لأنها جديدة مش دايمن بتنفهم عليه، أوقات المذيعة بتفكّرو خلّص جوابو، بتبلّش تسألو السؤال التاني، بيكون هوّي بعدو بنصّ الجواب الأول، هيك شي... وهيدا رِجِع، إذا بقريطم بيفهموا عليه، مش قصّة.
غازي يوسف 76410 أصوات، شي متل الكذب، أيّا، هيدا الكذب بعينو حتى ولو انوجدوا الوراق بالصناديق، عم بحكي عن شي تاني أنا، 76410 أصوات شو عمّار الحوري هوّي؟! عمار آخد أقلّ، عمار 76201 صوت! معقول؟ يحترق بيتو لعمار لحتى غازي يوسف يجيب أصوات أكتر؟ هلّق محمد الحجّار برضو طِلِع بس عندو مشكلة، الحجّار جايب 62072 صوت. بس كيف رح يشوفهن؟ أنا صراحة ما بعرف هوّي كيف بيشوف، الحجّار بيضل مغمّض، هلّق أنا مش شايفو إلاّ عالقاعد وبيكون مغمّض، ما في عيون يعني تشوفها، شو بيعمل لهيك؟ ما بعرف. وهولي بيجولهن شي 62000 إنسان، كيف رح يقدر يشوفهن كلهن، هلّق يمكن ما تكون قصة طالما هنّي بيأمّنولو!
وسامي الجميل شو؟ سامي طِلِع؟ النتايج الرسمية هيك بتقول، يعني خَلَص بدنا «نعْطُبِر» إنّو مضبوط (نعطبر بحرف الـ ط مش الـ ت، وهاي مش غلطة مطبعية، هاي «نعطبر» متل ما بيلفظها الرئيس أمين الجميل) وهيدا لفظها المضبوط، لأنّو الرئيس جايبها معو أباً عن جَدّ من مصر ومصر هيي المصدر، مصدر بيت الجميل نفسهن، «غَاتَك نِيلة»!
طيّب بأيّا منطق بيطلع سامي وفارس سعيد الأمين العام لقوى 14 آذار ما بيطلع وهاي تاني دورة، فارس سعيد «حبيب القلب» فارس هوي ومازولا، وكيف الطريقة نْفَهّمو إنّو فهمنا إنّو هلّق انْعَرَفْ مين مظبوط بيمثّل المسيحيين حسب ما هوّي بيتمنى: إنّو مش العماد عون رغم الـ22 نايب إللي طلعولو، كيف في طريقة يطلع عالتلفزيون ويحكي بس بغير شي؟.
أما دولة الرئيس «مايك المرّ» فشي تاني دوماً... مايك سقط بسّ طِلِع أوكّي؟ هيك أصولها، يعني ما طِلِع بس طِلِع، هاي سنّة المتن الشمالي يا شبابي!! هيك هوّي معوَّد وداوخ الكل شي أكيد، لأنو إذا ما طِلِع بتأذّوه، وإنتو ما بتريدوا، شخصية تاريخية فاتحمّلوه وبلا تْشِفْشُق حكي وإشاعات.
أما طرابلس فالصَفَدي حلّق ويا ريت ضلّ وحدو، سمير الجسر جايب أقلّ منو بـ12180، وبيستاهل لأنو مفكّر إنو هوّي المستقبل الأصلي. إنّو إذا هوّي المستقبل، الصَفَدي اللي جايب 66139 صوت شو بيكون، الآخرة يعني؟ هلّق طبعاً من أهم اللي بقيو بالمنية ـ الضنية، «الفتفت» أحمد فتفت جاب 37667 صوت، هولي بالنسبة لـ«العميل 009» أكتر من ممتازين، أحمد فتفت صحيح، بس رجع يفتفت فجأة، وما في خوف صرنا عا آخر، راح الكتير وبقي القليل. من اللي رجعوا طلعوا كمان بالبقاع الغربي، جمال الجرّاح بـ33389 صوت، على فكرة جمال هوّي الوحيد اللي بعد ما انلقط، وأنا بفتكر إذا وصلولو للجرّاح هيدا، رح يكون محوَّل عا «غوانتنامو» دغري، ما ببيت ليلة بنظارة قصر العدل.
(يتبع)


12‏/06‏/2009

عقاب صقر 49238 !!!

زياد الرحباني

الأخبار عدد الجمعة ١٢ حزيران ٢٠٠٩


أكبر كتلة بالنتيجة طِلعِت "كتلة المستقبل" وهاي الكتلة الوحيدة الّلي ما إلها مستقبل. ممكن تجيب المستقبل للشعب اللبناني السعيد، بس لإلها صعبة، ما إلَها، وعلى مسؤوليتي. ما هنّي كيف قدروا طِلعوا ستين نايب، طلعوا لأنو حشروا فيها راس وكعب، قول معي: قوات لبنانية، قوات سليم دياب المنحلّة، لواء مجاهدي عكار، كشّاف الجرّاح، قرنة شهوان، مسيحيي 14 آذار، وانتبِهلي: قوى 14 آذار وأرمن التزكية والحوري، الحوري كتلة وحدو، وغازي يوسف، غازي جايب يا عالم 76410 ! وبقايا تجّار مرفأ بيروت ـ إي هاي الجَمعَة متل ما إنها أكبر جَمعَة بالمجلس الجديد، هيي كمان أكبر تجمّع للبروستات بالبيروتَين... بعدين قد ما ولاد طريق الجديدة بيحبّوا "الحكيم" قد ما البشرّاوية جماعة العَرَق الـ sec ومريم ام النور بيحبّوا نهاد المشنوق، خاصة بس يرخي حَنَكوُ ويعرِّض النِطِق ويِقشط البيروتي من "بؤو" (تِمّو)، شو لكان؟ البشرّاوية بيحلفوا بإسمو للمشنوق إي والله... بعدين هولي كومة كبيرة من التجّار يعني هولي بيتعاقَدوا أكتر ما انّو بيتحالفوا، التجّار، الله ما بيعرفوه، بدّك يتعاطوا بالسياسة او يقروا تحليل؟ ما بدّك يكون في وقت يقروه واذا قريوه يفهموه، لذلك ولأسباب كتيرة "لا يتّسع هذا المقال لتعدادها"، هاي الكتلة الوحيدة اللي ما الها مستقبل، ما بيأثّر، بس عندها بالمقابل ماضي.... أخو اختو... هلّق المهم بالنسبة لألهن، إنهن طلعوا، صاروا جوّا يعني... الويل لأمّةٍ!
في إشيا بدّو يقيّد فيها ملاحظة الواحد (note)، بدّها تسجيل عاورقة، بس في إشيا: لا، ما بدها شي... إشيا بتقتحم الذاكرة، في إشيا بتخلخل الخَرَف حتى! متل سقوط فارس سعيد أو سقوط ميشال كوكو معوّض وطبعاً بأسبقية تبخّر إمّو الفاضلة من وقتها، إي شو هيّنة؟ تنين من بيت معوّض زاحوا؟ إنشا الله معوّضين يا رب... درب الحرية طويل وميشو عارف وعم بيأسّس وهوي قال، أنا سمعتو.
أما "مصباح خوليو الأحدب" فحدّث ولا حرج ولا هَمَج ولا دَرَج كل شي عملو إنو خَرَج. أنا ممنونو الشعب إنفرج. (هاي بلكي بيلحّقها الفنان عاصي الحلاني وبيلحّنها وبيغنّيها، وما بيدبكوا وراه مغاوير الجيش تحت أيّا ظرف من الظروف، أنا رح جرِّب إحكي مديرية التوجيه). وليش كارلوس راميريز إدّه مش ضيعانو؟ خاصةً بوجود أوغاسبيان وهلق نايلة التويني، هولي كانو تلاتي بيقدروا يأسسوا مَجمَع لغة عربي لبناني لـ "نزلة فسّوح" و "طلعة العكّاوي" وشو بدهن بأهالي أدما أو الكسليك، هوليك كتير ضعاف بالعربي... إنو اللبناني يعني... قليلة يا جماعة إنو كل المِلَل بالبلد بتقول بكل بساطة: ما بيعرف يحكي عربي وبتقصد: لبناني... هاي معناتها شو؟ معناتها إنو اللبناني تفصيل عند الهوية، متل ما البَحريَني تفصيل او المصري تعطيل وإحنا عَرَب يا سوسو!
وبعدين معليش اذا غطاس خوري تعرّض للغبن وللطعن وشعور لأسبوع قبل وأسبوع بعد بأنّو من المستضعفين... مُخبر أميركاني مستضعف واستفرد فيه الاستكبار بهالآخرة، هاي إشيا "جَدِيدِة" لانو الشرق الأوسط هلّق، "جَدِيد". ما بيهمّ، المهم "الحكيم" مبسوط مع إنو قلّلوا نوّابو واحد وزادوا نواب الكتايب واحد (يرجى الانتباه) بس هولي بيتنزّلوا واحد بسهولة، بكرا هيك بالأحداث المتفرّقة للي عادة بتكون وراها سوريا بحسب رئيس الهيئة التنفيذية للقوات اللبنانية، كأنو حدا مصدّقو هوّي وهاللقب. بتعرِف لي مبسوط؟ لأنو عم يحسب كتلة المستقبل بأمّها وأبوها فوق رَهط نوّابو الخمسة، عم يحسب كل نايب منّو للجنرال عون، لإلو... إي والله. قد ما بيعزّو وبيقدّرو.
(تابع)


08‏/06‏/2009

وأنــا كَمِــــــان

زياد الرحباني

الأخبار عدد الاثنين ٨ حزيران ٢٠٠٩


مش ضروري كون من بيت حمّود ولا من بيت الشمّاع، مش مضطرّ كون من بيت الجيباوي ولا البساط، ما في شي بيقضي إنّي كون من بيت المشنوق ولا من بيت دياب، ولا من بيت الخطيب ولا العيتاني، هونيك! ولا في حاجة كون من بيت الدَنا ولا من بيت حمادة او الخشّان ولا السبع ولا الضبع ولا المنلا ولا نعيم، منّي مضطرّ صير أخو نصير الأسعد أو تروتسكي . و. سعادة، منّي مجبور كون حتى من بيت الحريري نفسهن، لكون مِعْني فعلاً وكتير، باستشهاد الرئيس رفيق الحريري، ومِعني أكيد أكتر من آل قعبور والشيف رمزي وشلّة «لا يُمَلّ»، هولي اللي ما بعرف بأيّا مرجع للذوق بيستعينوا لحتّالي مصدّقين بكل بهجة إنو هنّي فعلاً: شي لا يُمَلّ.
هولي اللي فوق كل شي متعَدّيين عليه من أفكار ونصوص مش لألهن ونكت وروايات شعبية، برضو مش لألهن، إتعدّو من فترة عالسياسة. طبعاً غياب الدولة بيعمل العجايب، متل هيك عجايب، منشوفها وقاعدين عاجزين ببيوتنا، ولاه خَيي؟ من أيمتا كانوا القوّات اللبنانية بيضَحّكوا؟ هنّي ما بيرضوا! ... استطردنا زيادة، ما تواخذونا.
انا مش مضطرّ إطلع لحّن غنّية ولا اكتب مقال ولا اعمل تصريح لثبّت إنّي مِعني بمقتل الرئيس الحريري.
لَيكو يا إخوان، انا كتير هاممني أعرف الحقيقة! متلي متل بيت الحريري. انا هيدي الحقيقة طَبلِتلي مُخّي وخربتلي المنطق والتحليل والحسّ السليم (قال). ما كلّ واحد عندو حقيقة ومبكّلة، وهيي عادة اذا كل شي عادي، بتبقى واحدة هيي. وفي أضرب بعد، في كذا واحد عارفين الحقيقة وعندهن الأسامي الكاملة وأرقام تليفوناتهن وعم بيطالبو بالمحكمة الدولية. طيّب هولي، بس هولي، شو بعد بدهن فيها بالله؟ ما شغلتها شغلة ومكلفة، مش إنّو / غير إنو رح تاخدلها بين الثلاث والأربع سنين «بالحدّ الادنى»، أول سنة بس رح تكلّف 51،4 مليون دولار، وهاي بدون إيجار المبنى ولا مصاريف الإجراءات الأمنية برّات المبنى وهولي على حساب الحكومة. معقولة يعني اذا واحد بدّو يعرف الحقيقة، بدّو يتِكّ كل هالمبالغ؟ الله أكبر! وفي عندك السنة التانية أرخص بس إنو شو أرخص يعني، يعني رح بتكلّف بين الـ 35 والـ 40 مليون دولار وفي حال في تالتة ورابعة بالحد الأدنى، بيجينا سعر، يعني بيضلّو كأنو سنة تانية... هاي إذا ما طرأ شي، إنشا الله لأ يا رب، لأنو أنا ما بقا قادِر...... بدّي أعرف شو ربّها هالحقيقة! حتى لو بدّي صير مضطرّ تابع رئيس المحكمة «أنطونيو كاسيزي» وكبير المحققين «نيك كَلدَس» أوسترالي ـ مصري هيدا واسمو نجيب، إي والله، وكان بالـ 2004 مع الأميركان بالعراق!! وطبعاً مش آخدين وجّ عليه ولا بدنا قد «بلمار»، بس مجبورين نتابعهن، لأنو أمورنا صارت بين إيديهن... ويعني تعا فكّر، بتصوّر رح بيكونوا أفضل من إنو نتابع الـ sir شارل رزق (ما تتابع شي وِحِش) أو الناطق باسم شاكر العبسي ببلاد الشام!
بودّي أكيد تابع المحكمة ومش قادر إنطر لا تلات سنين ولا أربعة! كيف بيت الحريري قبلانين بهالقَدْفِة والله ما بعرف.
أنا بدّي أعرف الحقيقة اليوم قبل بكرا، هاممني كتير أعرف مين هالحمار اللي قرّر يقتل رفيق الحريري، حمار وهل قد منظّم وتوفَّق مش بس بالحريري، توفّق بكل شي كان بدّو اياه من وراه... ومصرّ أنا، إنّو حمار، حمار بس «قادِر» لانو طبعاً بلدنا ونحنا، آخر همومو.
خلّصني، إخت اللي بيجيه بنت وبيسمّيها: بكاسيني!


02‏/06‏/2009

من مدينة "همبورغ" [2]

زياد الرحباني

الأخبار عدد الثلاثاء ٢ حزيران ٢٠٠٩


1 ـ دايمن اللي ما بيورّث شي، بيوحّد الناس... بيزيل الانقسامات العائلية والاجتماعية المعنيّة وغير المعنيّة أحياناً، بيحسّسهن بشعور البروليتاريا المركزي: «ما عندك شي تخسرو»، وبتصير تفهم: ليه محزونين. راح هالشخص وما ترك شي يخسروه. هلّق بالأربعين عموماً بيرجع بيمشي الحال، بيرجعو الورثا والأصحاب بيتشتّتو، كل واحد بيرجع يلتحق بطبقتو ـ وبلبنان: بطايفتو.

■ ■ ■

2 ـ عالعَجَلة ولأنّو مش دافعلي عالوقت وبعدو مأخَّر، شو بيقلّلي هوّي وعم يسكّر التلفون: ممنونك، كلّك ذوق... أهلاً معك!!!
«أهلاً معك» عبارة مش موجودة إنما أكيد قصدو: «الله معك» وأنا للي بتمنّاه من كل قلبي، إنّو الله، هيدا نفسو إذا فعلاً معي، الله لا يوفّقو، وأنا كمان متلو: ممنونو وكلّو ذوق وكذب وأهلاً معو!... وهالأشيا هيدي، طبعاً من بعد ما يكون دفع.

■ ■ ■

3 ـ في إشيا ما بتنحَلّ إلاّ وحدها.
الأرجح إنها بتتحلَّل مع الزمن.

■ ■ ■

ملاحظة: 4 عاجل ـ انتخاب
الحكيم مِصْفَرّ، مش عاجبني، وعم بْقول هالشي لواحد كتايبي (يُرجى الانتباه) جاوبني: «لا مش قاعدة، هوّي أساساً أصفر»، فلَفَتِت نظرو إنو الأصفر تبعو عم يتغيَّر، جايِ عا أزرق فاتح هاليومين، يعني شي من أزرق المستقبل، عا سماوي بيكون، قللي: «مُمكن وهاليومين الباقيين قبل الأحد، عِرضة يروح عا زراق أكتر بعد، ما بيصرلو شي بس!»، جاوبتو: ليك، بفتكر إنو عايش صراع بين صفارو وزراقو، وهيدا من ورا حالة التمزُّق بين أصفر حزب الله وبين «كِتَل المستقبل» اللي عم يلعن سماها وعا مَضَض... انتبه ما هوّي بطبيعتو المركّبة كحكيم ومقاوم لبناني وقديس مدني ومُتيَّم جيش ــــ دولة، وكزوج للـ«ستريدا دي ميلانو» وكسليط وفنغري عند اللزوم، بيكره التْنَين سوَى، ما هول شيعة وهوليك سِنّة، إسلام كلهن يعني! يعني وَيلو الصليب والكفتة النيّة البشرّانيّة هيي والعرق البلدي اللي ما إلو عيار واللي كلّ اللي بيشربوه، بيضلّوا نص مسمَّمين كحولياً وشخصياً وبيطبّو أول المسا قبل نشرة أخبار الحكيم عا بخار العرق اللي بزر العنب للي فيه، بيضربهن مش بس بالحكيم، بيضربهن بوجع راس قاتولي بيستدعي الصلا والتضرُّع والرعيّة ليفكّ... عرفت كيف؟ الصليب والأهل من ميل و«سعد» من تاني ميل، سعد أخونا وحبيبنا سعد! هيدا كمان ما بيقدر يجاري الحكيم بكل أخبارو وأخبار جماعتو، ويلو الموارنة والبطرك وويلو الجماعة الإسلامية والجماعة السعودية. ليك سعد تِعِب منيح لطبَّق كل سنّي لبناني بالحكيم، من الأساس، والمهم إنو بعد هالتعب، يلقي نتيجة... وليك سعد ما بتهمّو النتيجة بالنتيجة، سعد أبيض، منّو أصفر أبداً، سعد أبيض متل الحقيقة، يعني هوّي أبيض والسما زرقا. هلّق طمنّي إنتو الكتائب شو عاملين أحد الجاي؟


18‏/05‏/2009

من مدينة "همبورغ" [1]

زياد الرحباني

الأخبار عدد الاثنين ١٨ أيار ٢٠٠٩


بمدينة همبورغ (ألمانيا) يا اخواتي يا حلوين، همبورغ للّي خصّصها قصف الانكليز بأواخر الحرب العالمية الثانية بشكل محبّب وموجّه وخاص، يعني مطرح ما كنت من أسبوعين، بعد الحرب العالمية الثالثة ع غزّة وبغداد وكابول: استحلَيْت فوت عَ مطعم وتطلع فيه المملحة ما بتنزّل ملح، وكلّهن، مطعم وسط، غالي، رخيص، كلّو ممالحو بترشّ. ومع الملاحظة إنو عدد قليل كتير من الممالح، حاطّين فيها رزّ. هيدا شو بيعني؟ هيدا ممكن برأيكم مش / شو هالتفصيل للّي بدّو مقال، لا والله هيدا مهم وكتير لدرجة إنو لازم كلّنا، نحنا عجايب هيدا الشرق الحزين، نقوم ننضبّ... تعو ننضبّ، أشرفلنا واللهِ... هلّق وين بدنا ننضبّ كلّنا ما عم بقدر أعرف. أنا بس لأنّي عم بتأسّف كتير عحالي، عم بكتب هالمقال، وما عم حرّض حدا ع حدا ولا في مين حرّضو لانّو كلّنا هيك، لسوء الحظ، وما دخّل الحظ، نحنا للي عم ندَخّلو.
ولِيه لي تلات أرباع الممالح عنّا ما بتنزّل ملح؟ وليه هَيْ شو دخّل رستم غزالي فيها؟ وشو بيقدرو الألمان يعملو بهيك حالة؟ ما في شي رح ينفع، أيّا تحريض؟ فانية وهيك. أساساً نحنا ما رح نحضرها للآخرة، لأنو رح ننقرض قبل بكتيييييير. هلّق أنا منّي عارف أيمتا الآخرة ولا يوم القيامة ولا الحشر بس للّي أكيد منّو وبقصّ أ...ي اذا نحنا مش قبلهن بكتير. خَلَص ولا يهمّكن! انتو بهالوقت خلّيكن عم بتحطّو رزّ بالممالح وإصْحا تغيّروهن أبداً كل فترة، وخدوا نتيجة! وخلّيكن عم تتمسخروا ع الصينيّين وع البضاعة الصينيّة (للّي غازية هامبورغ) وع البضاعة الكوريّة والماليزيّة واطرقوا إيد بإيد وقولوا: Yes! وكتبوا حرف العين برقم 3 والهمزة بالـ 2 ونزلوا من جيب طلعوا بالتاني ع أساس الحالة كتير تعبانة.
الظاهر إنّو يسوع المسيح لمّا قال لتلاميذو: "أنتم ملح الأرض فإذا فسد الملح فبماذا يُملَّح؟"، كان عم بيوجّه رسالتو للألمان انتو ما ألكن تعلُّق... نحنا يعني، ما إلنا تعلُّق. نحنا بدنا كل يوم نطلّ عالمملحة؟؟؟!!! بعد ناقص، ما في مية ألف شغلة براسنا.
مين بدافع عن الحريات؟
مين بيحمي هالديموقراطية الوحيدة بالشَرق أو تحت اللسان؟
مين بيوقّف المخططات الإيرانيّة ـ السوريّة؟
وأخيراً مين بيحرس ثورة الأرز؟
طبعاً، لبنان أولاً.


14‏/05‏/2009

Monique

زياد الرحباني

الأخبار عدد الخميس ١٤ أيار ٢٠٠٩


الغبرا سودا عادةً، اخترع ربّنا/ فظيع، ربّنا جَدّ، رهيب!... اخترع ربّنا للنسوان/ ما معقول! النسوان هنّ وذكاهن والاحتيال اللي عليهن بالتنظيف والوسوسة بالنظافة، من ضمن الاحتيال العام طبعاً، اخترع ربّنا غير الغبرة السودا عالإشيا البيضا، غبرا بيضا للإشيا السودا، خصّصها يعني بالعدل الكامل. يعني غبرا متواصل إن كان أسود أو أبيض. فلازم الإنسان إذا بدّو فعلاً ينظّف، ويقْرقْنا بإنّو ما عم يقعد ونْقَطَع ظهره من التنظيف، ينظّف، مش يروح يشتري كل شي في أسود بدال الأبيض، إنّو هوي حابّه وبيموت فيه وما بيعطي قيمته لحدا. فهمتي يا "مونيك" (Monique)؟


13‏/05‏/2009

مِش عاللاش

زياد الرحباني

الأخبار عدد الاربعاء ١٣ أيار ٢٠٠٩


مِش عَاللاش ما بتلاقي خـ..ا الكلاب بكثرة إلّا بالمناطق الأرستقراطية. منّا صدفة، كميّة خـ...ا الكلاب بالـ Zone B أو C مثلاً. لاحِظ بمناطقن، قدّي مناطقنا تعتبر مشحّرة ومش صحيّة، بتِغْلَب بالكلاب الداشرة إنّو تخـ...ا شي مرّة عا رصيف، حدّ فرمشيّة، ولا يمكن!
إنّو حتى لو عا سبيل إنّو نقلّد المناطق الأرستقراطية الراقية واللي كلها خـ...ا، مستحيل.
الكلاب هون بيعوّوا، بيعضّوا، بينعفوا المزبلة ما بيخلّوا عضمة فرّوج بمحلها، بيتلّوا الدني بس ما بيخـ...وا. فظيعين من هالناحية، في عزّة نفس مخيفة عندهن، شو مصدرها ما بعرف، دكتاتورية البروليتاريا؟ عيشة التسكّع والشحادة؟ ممكن الكتام عا قلّة الأكل والأطباع اللي بتنتج عنّو.
حكمة اليوم: يا مَحْلى الكتام عند الخـ...ا


11‏/04‏/2009

جمعة 14 آذار العظيمة

زياد الرحباني
الأخبار عدد السبت 11 نيسان 2009
- الآب: لاه يا بابا، الجمعة الحزينة ما دخّلهن فيها السوريين، هيدي حزينة من قَبْل السوريين بكتير يا بابا... معقول ما قالولكن عنها بالمدرسة؟
- الابن: ما بيقولولنا شي.
- الآب: كيف هيك؟
- الابن: كلّن عن إشيا مش مظبوطين، بيخافوا من السوريين لأنو.
- الآب: ما بيصير بابا هَي أفظع مدرسة، بعدين السوريين: بَحّ! راحوا السوريين شو بعدها عم بتخبّركن المدرسة؟
- الابن: ومين صلب المسيح؟
- الآب: اليهود بابا، اليهود هنّي اللي صلبوا المسيح!
- الابن: أكيد؟
- الآب: أكيد بابا.
- الابن: آه، من شان هيك هجموا عليهن حزب الله؟
- الآب: أيوااااا!!!!! شفت كيف Pappi؟ هيك بدّي ياك.
- الروح القدس: أستغفر الله! (والوطن والعائلة). آمين.