29‏/11‏/2014

Тбилиси | صباح

زياد الرحباني

عطيتكن عمرها صباح، عطيتنا كلنا عمرها، الله يرحمها. الحمدلله إنو ربّنا سبحانه قرّر بعد هالمرمرة الطويلة والعذاب البلا عازة، يرحمها... كتّر خيرو الّلي رحمها آخر شي، رحمها منّا. من شعبها المنزوع الوقح والكذّاب! صباح ما كانت تستاهل تعيش هالكم آخر سنة بهالشكل البشع. ونحنا كنّا كبشر عاجزين قدّامها، نحنا معوّدين عالعجز صرنا، وبدنا حِجّة، إنّو شو؟... حالة حرب وخربان بيوت وعيشة بالصدفة بهالحقلة اللي ما إلها معّاز على راسها. إيه طبيعي كنّا آخر كم سنة، بس نشوف صباح، نزتّ كلام من نوع: ما في عدل، وين الشرع وين الناموس؟! ويا حرام الشوم... هيدا أكتر شي. ومن هونيك ورايح نقلب بالريموت كونترول على قناة تانية، نحنا جمهورية الوحوش والريموت. عن جد الله رحمها منّا.
وليش مع إنّو الأعمار بإيدو قرّر يتركها تتعذّب بيناتنا هالقد... ما... سبحانه هوّي الآمر الناهي العليم القدير، كلّن!
إنّو إذا صباح كريمة لازم تنتهي شبه معدمة؟ إنّو إذا صباح طيبة ضروري تنتهي وحدها؟ إنّو إذا صريحة كتير كانت، مكتبلها يتألّف ويتفبرك عنها هالقدّ قصص؟ مش وحدي أنا طالع معي إحكي هيك، أنا بعد كم ساعة معدودة من وفاتها سمعت السيدة جانين، بنت أخت المرحومة نجاة، باتصال من مصر عإذاعة صوت لبنان، عمبتقول تقريباً نفس هيدا الحكي... انشالله تكون أخيراً صباح ارتاحت عالقليلة من اللبنانيين القوايا الفهيمين الشاطرين المتفوقين الوحيدين والفاشلين... وتابعين!!! هولي الّلي ما معروف، هيك «لله بالله»، كم مرّة موّتوها قبل... إنّو شو كان بدن فيها وباللتّ والنميمة والتلفيق؟ هل في سبب بيفسّر تصرّفاتهن غير: قلّة المروّة والمسؤولية والتعب وكترة الزنطرة والعطالة والبطالة ورا المكاتب والأكل والمرعى وقلّة الصنعة؟ منتصدّق نحنا إنّو منزعل عحدا؟ ما لتزعل عحدا لازم تكون كتير بتقدّرو هوّي وطيب، بتّابعو وبتدعمو... ولاه في لجان حكم آخر زمان قدرت تتطاول عصباح من قبل ما تعبت، وقدرت تحدّدلها مثلاً مطربة معاصرة خليفة لإلها! مين هنّي هول أساساً لو ما الحرب الأهلية، كلهن اللجان والفنانين؟ لأيمتى بدو يضلّ الجيش مشغول بعرسال وبأمتال الكبّارة والضاهر وحصراً؟
غنّت صباح ببعلبك مرّة:
يا خيل بالليل اشتدّي
ويا أرض ساعينا وهدّي
وان كان ما فيكي تهدّي
انهدّي انهدّي انشقّي* انهدّي

* انشقّي وابلعينا
سياسة
الأخبار - العدد ٢٤٥٧ السبت ٢٩ تشرين الثاني ٢٠١٤

27‏/11‏/2014

Тбилиси | الحركة؟... طبعاً

زياد الرحباني 
 
إذا بدّك أي شي أو مخلوق أو بلد تصوّر أو حتى زمن يخرب، إتركو أو إنصحو أو ساعدو أو إدفشو (يعني مش مباشرة، عكسها)، إدفشو ليوقف... أيوووا. وفيك، لَمَا يحزر شو مفكّر تعمل فيه، تقلّو بشكل نصيحة عفوية و... إنسانية: ليك؟ «خفّف، روق، ارتحلك شوي»، وهيّي كانت! بيصير يعني تابع للقصص الّلي بتتخبّر للولاد أو حتى للناضجين المشتركين منهم بالـ «أو أس أن»، وخاصةً ليل نهار. شو ما كان، انتبه زلمي، إمرأة، حزب أو بلد، بيصير بينحطّلو قبل إسمو أو صِفتو: كان يا ما كان بقديم الزمان... كذا... خربان.
ولاه إذا كابل معلّق بكابل تاني، وبدّك ياه، شو بتعمل إنتَ لتوصلّو؟ بدّك تحرّرو فبتصير تسحّب فيه لتخلّصو من «زميلو» الّلي مانّك عايزو. إيه شو بتكون عمتعمل؟ حركة. والصابونة لترغي شو بينعمل فيها ومعها؟ كمان حركة وتفرفُك متواصل، وإلا بتضلّها عمتتطلّع فيك وتتطلّع فيها، كل شي هيك. الجماد مؤقت لازم ومش أكتر (هيدا إذا بسّطنا الأمور بالجريدة لأنو مقال هيدا ومحدود المساحة وما فتنا بقصّة إنّو حتى الجامد هوّي متحرّك بس كتير أبطأ من الّلي أسرع منّو، واينشتاين كمشو ودري بأمرو... حقّق معو لأنو). الجماد ممنوع يا عالم، الجماد هوّي الموت وانتهينا. إنتِ منتبه عبكرا بكّير، بس تكون المحلات شي مبلّشة تفتح، كيف دايماً بيلتقى واحد عطلجي، وبيوعى أكتر منن كلهن، وبيبقى آخد زاوية بالشارع، وعموماً بيقعد على نفس الحفّة. وليه ما دامو بيوعى هالقد بكّير، ما بيفكّر يشتغل؟ ما بعرف... يمكن البلد؟ ممكن بس بلا ما نفوت هالفوتة... البلد!! يا لطيف. دخيلكن خلّينا بموضوعنا بلا البلد، ولاحظوا كيف بيوقف صاحبنا بس يشوف محل فتح وبيتوجّه صوبو، وطبعاً ليه؟ ليشتري؟ أكيد لأ. بدّو يحدّثو ويقتل جزء من الوقت الميت لأنو واقف. شو بيسألو عادةً بعد السلام؟ بيسألو شي مشتق من: شو كيف الحركة اليوم؟ الحركة طبعاً، مش الجماد. الجماد بيكون تاركلو ياه لإلو، تاركو هوّي ينعي عن الجماد لأنو، رجعنا، البلد بتعرفوا، مزدهر ومعلّي وعمبيحطّم أرقام يومية بآسيا عا صعيد الناتج، وكل يوم أفخم من يوم... ليك، شو أسوأ شي معقول تقلّو إياه لولد؟ لحتّالي يصير يكرهك وبساعتها؟ بتقلّو بكل بساطة: إجماد هون! أو إجماد بأرضك، وهاي أقوى وبتفزّعو أكتر. إنت شايف عيونو كيف بيكونوا عمبيطلّعوا فيك من تحت لفوق، وبأي محبّة وإعجاب؟ بيكرهك من كلّ قوتو لأنو عمتوّقفلو الحركة. ما الولاد هنّي الحركة، مش إنتو.
سياسة
الأخبار - العدد ٢٤٥٥ الخميس ٢٧ تشرين الثاني ٢٠١٤

26‏/11‏/2014

Тбилиси | ما بأثر

زياد الرحباني 
 
ما بحياتو، وعلى امتداد الحرب الأهلية، كان في شي فعلي اسمو «وطنيين». هيدا من الأساس هيك والأساس يعني: 1973-1975. أنا بيصيبني نوع من الإبتسامة الصفراوية مع إنو مش من أطباعي كل ما اسمع حدا كنت، أول أيام الشهيد الرئيس رفيق الحريري، عم يتشدق بتحليلو المعمق لمدينة بيروت وتاريخها النضالي «الوطني»... خليني قلك، الوطنيين هول كانوا مجموعة من اليساريين والناصريين والقوميين العرب اللي كلن مناصرين للقضية الفلسطينية شي أكيد، سمّوا حالن وطنيين لَمَا يزعل «الإسلام».
وصراحة كان «الإسلام» بشكل كتير طابش وأوضح «الإسلام السني»، هيدا إللي بيعتبر جمال عبد الناصر، واحد أزعر كافر وشيوعي ما معروف شو ربو!!! ملاحظة: للمعلومات، إجا وقت خلال الحرب الأهلية، كان أسهل بكتير لأي مسيحي ماروني إنو ياخد الفيزا عالسعودية من أي مسلم سني!!! ليه؟ لأنو كان ممكن كتير يكون سني وطني، إيه نعم... أما الشيعي فعموماً ما كان يطلبها لياخدها.
الوطنيين هول مع وصول الحريري عالسلطة بداية التسعينيات، حسّوا عليه وعفريقو إنو بدو ياهن حدّو كمان، مش بس التجار والمستثمرين. ليه؟ لأنو ذكي وبدو يحصرها كلها بالسراي. يعني اليمين بيطلع من هالأوضة واليسار بيطلع من هاي، السراي واسع متل قلعة بعلبك، «قلعة كبيرة وقلبها كبير وبساع الدنيا كلها». (نحوي) فما كان منهم إلا أن تشاوروا بالأسعار كي لا يخطىء أحدهم بـ «رقم أتعاب» ويفوّت الفرصة الذهبية، ونسوا ان يقاطعوا لأنهم معارضون، وقرروا بالمقابل أن يقاصصوا الشهيد المرحوم بمعاشاتهم الطاحنة. «إيه والقرآن». طبعاً الحريري هنا يفاوض مفكراً وأحياناً ماركسياً اي مثقفاً إجتماعياً إقتصادياً تنموياً، ومادي... مادي جداً «طلع». فهو مُكلِف بالفعل لأنه ثوري كاد ان يغيّر تاريخنا لولا التدخل العسكري السوري الغاشم!!! هذا ليس عبد المنعم يوسف او محمد الحوت ولا قاسم مشتركاً بينه وبين فريق الحريري يا عينو!
(محكي) هولي خزانات من المبادىء وما بينشروا مبدئيا... ها، وكلمة مبدئياً اساساً مشتقة من المبادىء إللي ناتعينها وإللي ضلو ناتعينها لآخر مفاوضات عالمعاش. وبس تمّ الإتفاق فعلياً، ما عادوا ناتعين شي مبدئياً. يعني كلمة مبدئياً حتى ما عادوا عازوها. بالنهاية طلع بعض اليساريين او الرافضين لمشروع سوليدير ما قدر فريق المُكَلَف يشتريهم ومصاقبين كمان اشخاص كتير قراب من الإفلاس وقتها... سبحان الله في امور دايماً بتجي مع بعضها. الحريري كان قوي بس هولي كانوا اقوى، لكن باللغة البيروتية الشعبية ولسوء الحظ، كان عددن قليل وبالتالي تأثيرهم: ما بأثر.
■ ■ ■
هيدا اذا لا مُخَيَّر ولا مُسَيَّر شو بكون؟
مُحَيَّر
طيب وإذا كل ساعة شي؟ ساعة مُخَيَّر وساعة مُسَيَّر وساعة مُحَيَّر؟
لأ بكون «م ؤ ي+ي ر»! (مبعثرة ومدموغة ورباعية الدفع)
سياسة
الأخبار - العدد ٢٤٥٤ الأربعاء ٢٦ تشرين الثاني ٢٠١٤

25‏/11‏/2014

Тбилиси | ما تفهميني غلط

زياد الرحباني 
 
أنا ما عم قلك إنك عم تكذبي عليّ، أنا عم قول إنك ما عم تقوليلي كل الحقيقة. يعني بالجزء اللي أنا تاهمك فيه، عم تردّي عليه بصراحة وما في جنس الكذب وانتِ مشكورة، إنما الكذب وين مصفّي؟ الكذب جاي بالجزء اللي انا ما بعرفو وبالتالي مش عم بسألك عنو، معقول إسألك عن شي ما بعرف بوجودو أساساً؟ انتِ لازم لتكوني صادقة ميّة بالميّة، مِنِك لوحدك تِجي تخبريني عنو، فهمتي؟... كيف ما فهمتي، إمبلا، يعني إذا الحقيقة عشرة كيلو فرضاً، أنا وإنت عم نحكي عن خمسة كيلو منها بس!! لأنو حضرتك معترفة بالخمسة كيلو بس كأنو الحقيقة كلها خمسة كيلو... مش قصة كذب بس إنو... ماشي. نسّوة يمكن، فهمتيني الأرجح، رايحة معك نسّوة تقبريني عرفتي كيف حياتي؟ وما تفهميني غلط.
■ ■ ■
إنو شو الفرق بين الدولة اللي صارت عم تشجّع على زوالها الرأسمالية المعاصرة المتوحشة، زوالها عند كل الأنظمة والدول غيرها، شو الفرق بين دولة هاي وشركتين او تلاتة كبار صارو بيملكوا كل شي موجود على الأرض يا ناس!! هولي شو الفرق بينهم وبين التأميم، بالشكل اول شي، وتأميم لعالم كامل عم تلتغى تحت الضغط، الحدود بين بلدانو المختلفة! رأس المال ما عاد بدو ياه هالاختلاف، بدو يرقمهم بس... عملياً هولي التلات شركات صارو هنّي الدولة الخفية وهني دولة خفية عالمية. هلق بطريق الصدف بآمنوا هالتلات شركات متل الشيوعية بآخر مراحلها، بالمشاع. مع فرق بسيط انو هالمشاع لإلهم. هلق صحيح ما صاير شي من قبل هيك شكلو، بس دايماً اي شي ليصير موجود، لازم يصير أول مرة. شي اسمو: مشاع مملوك.
سياسة
الأخبار - العدد ٢٤٥٣ الثلاثاء ٢٥ تشرين الثاني ٢٠١٤

24‏/11‏/2014

Тбилиси | لاحظ

زياد الرحباني 
 
لاحظ كيف كل الإشيا اللي بتخرج عن اطار القياس بالرقم، شو ما كان نوع القياس، متر، كيلو، ليتر، درجة، بايت، غيغا بايت، دولار، مازورة، بيزوس... الخ، ما فيك تثبّتها ولا تتثبّت منها.
خود لالك: الحب، العاطفة الجياشة، الصدق، النية الحسنة والثقة.
وقال مرّة اخترعوا ماكينة لكشف الكذب، ايه صاروا بولاية يطلعوا كلّن صادقين، وبولاية تانية يطلعوا كلن كذّابين.
هاي إشيا ما فيك تثبتها، الا فيها نفسها. وبرضو مش تثبتها، فيك تضلّ عم تأكّد عليها، وهات مين يصدّق... يعني الحب بالحب، الصدق بالصدق، اما الثقة، بتأكد على الثقة بشو؟ بالثقة قال. وهيك... مش اكلة، قرطة!
سياسة
الأخبار - العدد ٢٤٥٢ الاثنين ٢٤ تشرين الثاني ٢٠١٤

22‏/11‏/2014

Тбилиси | فكرة

زياد الرحباني 
 
بمجتمع مصاري، بتصير بمجرد إنو ما رح حدا يقبض منك على فترة، لا صاحب مِلِك ولا خدمات بناية ولا بلدية ولا فؤاد س. ولا شجرة اللوبية ولا المدرسة ولا الهاتف ولا الموقف ولا موزّع الكهربا والدش إلخ...، بتصير هاي خبرية حقها مصاري. طبعا، وهاي بلغتو لهيدا السوق اللي «مسرغلين» فيه وإسمو كرمال الأخلاق والفاتيكان: مجتمع. كيف هاي خبرية حقها مصاري؟ رح قلك كيف: باقتصاد ربح الرأسمال وخسارتو، إذا ما دفع، يعني ربِح، وفوراً، لانو الدفع طبعاً شغّال!!! ربِح بدون ما تنمسك او تظهر حتى العملة. وإذا ما ربح، يعني ألكارثة، لانو يعني خسِر.
هيك يا اخواتي ليل نهار. عملياً ما في «كيت». كذبة هاي... إنو «كيت» أو «كَيَّتِتْ» معو وعربياً عدّلت معو، يعني خسر، يعني طُلّوا عليه. شو هو عم يشتغل ويتعذّب ليرد مصرياتو؟!!X؟؟!!!**%#@}o↓◙ƒÖ!!! معقول؟ طيب وين مصريات غيرو ما صاروا معو؟ يعني في أزمة، يعني ناسي شي هو أو عامل شي غلطة. لأنو انوعد و «سنّ»!! وإذ طلع «كِيْتْ»، طلع برّا يعني وعرّض مصرياتو للهوا الطلق، فيا ويل المواطنين الشرّايين، يا ويلهم من الله مباشرة.
انا تعبت كارثة هالجو. ليك بلّشت اعرق كمان، متل منّك شايف، بس هيك مقضيينها، وضفلها الحرية، عرفت أياها؟ أقوى وحدة، وزيد عليهن العنفوان ما غيرو، هيدا اللي خالصة مدّتو، وإذا بدّك شي، انا عا رقم البيت.
■ ■ ■
نيالهن
أنا أكيد صرت إنو في ترابط وثيق بين إنو الجردون خاصة ومن بعدو الفارة، ما رح يتأثروا خالص وقت رح تنكبّ القنبلة النووية، وبين شو مفظّع فيهن البني آدم، هُوّ وعلماتو. تشريح فيهن، تشريح متواصل ومزمن بألوف مراكز البحوث عن حقيقة الكون والمخلوقات والاشيا. تشريح وتجريب وتعذيب وسلخ وتربيط. إنو الجردون يا عالم، ما في نوع دوا أو محلول أو معجون أو سائل أو مشروب او مركّب ما مجربو، وعا شرط هو ومربّط عا ضهرو، والفار بعيد عنّو شوي، وعم يستنجد... طبعاً لأجل العلم وتطوّر الإنسان... فبكرا بس رح تنزت النووية، او ربما تفتح وحدها عا قلّة الاستعمال ونفطس كلّاياتنا يا اخوان، هلجردون وزميلتو رح يتنعموا من بعدنا بالفرق، إنو الكرة الأرضية بس بلانا. مناعة!!! قرطونا بالمناعة.
سياسة
الأخبار - العدد ٢٤٥١ السبت ٢٢ تشرين الثاني ٢٠١٤

21‏/11‏/2014

Тбилиси | هاي مش عا أيّامي




زياد الرحباني



سياسة
الأخبار - العدد ٢٤٥٠ الجمعة ٢١ تشرين الثاني ٢٠١٤

20‏/11‏/2014

Тбилиси | Berlin charlie checkpoint 3

زياد الرحباني 
 
خلّونا يا جماعة نحاول نحصر هالكمالة اليوم لمقالين قبل لأنو هيدا نوع من البحث إللي عادة ما بينفات فيه بمقال، صراحة. إنما هلق فتنا وحصل، المهم نعرف نطلع. في حقيقتين، واحدة من صنع الانسان، وواحدة من صنع الطبيعة. الحقيقة الاولى: كل منتَج إلو سعر إجمالي بيقررو البياع ـــ هالسعر مؤلف من: سعر الكلفة + أتعاب اليد العاملة + ربح البياع ـــ هلق سعر الكلفة سِرّ علينا نحنا وعالطبقة العاملة، اللي عاملتو للمنتَج، تصوّروا. وليش سِر؟ لأنو اولاً أجور الطبقة العاملة مش بس معروفة، أشهر من أن تُعرَّف لأنها دايماً أوطى أجر ممكن قبل ما تقوم القيامة وتتحرك لا سمح الله هاليد العاملة او تعترض او تأضرب.
فإذا بهالظروف انعرف بالغلط سعر الكلفة، والأجور أشهر من ان تُعرَّف، بينعرف دغري شو ربح البيّاع!!! وهيدا اللي ممنوع! عادة الإنسان ليش بيخبّي تفصيل عن المجتمع؟ لانو بيشعر إنو إذا انكشف هالسرّ، رح المجتمع ينزعج بشي طريقة، وهالطريقة ما فيه يضمن نتايجها، وهو أقلية، فبيخاف إنو ربحو اللي مناسبو هو وحدو، وعادة ربح كبير، وهو كإنو مستحي فيه، ليه؟ لأنو في زعبرة بمحل معيّن: طبعاً ما دام مبلشين بسرّين من أصل 3 أرقام، هاي إذا ما في غش بالمواد المصنوع منها المنتَج، يعني منصير بسرّين وكذبة. بيعرف الرأسمالي إنو الغريزة الانسانية إذا عرفت بربحو رح تقول: ليش هو بس مش نحنا كمان؟
الحقيقة التانية: الطبيعة خلقت الإنسان بمتناقضين أساسيين. الاول: الأنا اللي هيي بتعميه إذا تركها بدون ضابط العقل اللي بيميزو عن الحيوان. لكن في حد الانا عكسها تمام، أي: الرغبة الغريزية بالمساواة. أي إنو ما بيفهم ليش غيرو عندو شي معيّن وهو لأ... قليلة! الأنا اللي مختَصَرها «أنا أول شي»، والمساواة اللي مُختَصَرها «كلنا متل بعضنا». يعني في بالإنسان بزرة للرأسمالية، وبزرة للاشتراكية. اكيد إنو التانية إنسانية أكتر لانها إجت بعد غريزة الانا الاولى. يعني تَطوّر. يعني بس وِعِي الإنسان إنو غيرو كمان عندو «الأنا»، وإذا صرنا ألف، منصير ألفX أنا، فشو منعمل ساعتها؟ متل ما عملنا من آلاف السنين؟ مناكل بعضنا؟ او منقتل بعضنا؟ ما هاي مراحل اختبرها الإنسان، وفضّل بسبب غريزة تانية مشتقة من «الانا»، وهي غريزة البقاء، فضّل السلم على الحرب، والتفاهم على النزاع. ونظّم هالكذا مليار X أنا، بإطار صاروا فيه: انا واحدة كبيرة. وهي الـ»نحنا»... طيب كل الناس راضيين ودايما موافقين إنو كل شي موجود لإلهن كلهن، إنو شو منعملّو فيهن لرأس المال، خاصة إذا مش راضي عن النتيجة هاي اللي وصلها المجتمع البشري؟ بعدين ليه دايما رب العمل بيعرف شو نحنا منطلّع مصاري بس العكس ممنوع؟ ما في جواب غير إنو اللي بيطلّعو رب العمل، بيهوّش الكلاب وبيهستر الأحصنة إذا فهموا، وبيهيّج الأسودة والنمورة والدبب إي والله. إنو معقولة فروقات المداخيل اليوم وين ما كان بالعالم؟ وليش اللي بيطلّع هلقد مصاري حاسس بالخوف... في ذنب مخفي! شخص عايش عا استغلال جهود الشغيلة وهو بيعرف وأكيد إنن بيستاهلوا أكتر، بس إذا دفعلهن بشكل عادل هولي رح يروحوا منو. وانتبهوا، بيكره حدا يتّهمو بالاستغلال، لانو هيدا شي هو مجبور يعملو وإلا رأسمالو ما بيكبر، إنو شو بدّك يقلّك؟ ما بيقدر إلا ينكر ويكرهك بعد اكتر، وإذا صرلو بس تجي الزودة ما يزدلك. فَحِلّ عنو، الثورة هيي بكرا بتحلها بالفعل، مش بس بالاتهامات. بالمحصلة النهائية، إجت الاشتراكية وَعَدِت إنو بمركزية رأس المال، ضمن جهاز مركزي إسمو دولة، قادرة تأمّن بالبداية، عالقليلة، الكمية ولكل الناس او أكبر عدد ممكن. وبعدين بتبلش تطلع بالنوعية واللي هيي لازم تكون: نوعية X كمية. وبلّشت وتعثّرت، بس معليش، التاريخ بعد ما خلص بعكس ما قال أخونا فوكوياما... أما الرأسمالية، فشو عِمْلت لهلق؟ لا نوعية بعد اليوم، وطبعاً آخر همومها الكمية لأنو بمفهومها: دوماً الكمية محدودة.
سياسة
الأخبار - العدد ٢٤٤٩ الخميس ٢٠ تشرين الثاني ٢٠١٤

19‏/11‏/2014

Тбилиси | Berlin charlie checkpoint 2

زياد الرحباني 
الاستنتاج الأول: رأس المال، وبذروة إنتشارو وسيطرتو عالكرة الأرضية، يعني بعد انهيار المعسكر الاشتراكي ابتداءً من تسعينيات العصر الماضي حتى أيامنا الحالية، تراجعت عندو النوعية بشكل مضطرد وما زالت، بشهادة المتنافسين الكبار نفسن وبمباركة وموافقة الشعوب من الشرّايين واللي بسهولة دغري بيقارنو مع نوعية الأفضل المعهود أو الماضي بشو ما كان.
طيب سؤال؟ إنّو بعد ما انفكّ الاستنفار الشديد اللي كان ضروري بالحرب الباردة عند كل أجهزة المخابرات الغربية والأميركية، لدرجة الاستلشاق ببعض الحالات واللي اتهمت فيها مثلاً الـ «سي آي ايه» بأميركا خاصةً بعدم التوقع والاستحياط الكافي لأحداث 11 أيلول، وبعد هبوط الميزانيات العسكرية المخصصة لمحاربة المعسكر المنهار، وبالتالي تحوّل جزء كبير من مال الدول الرأسمالية للرخاء مفروض، والاختراع والتحسين والتطور، ليش عميصير العكس؟ ما البعبع الاشتراكي وقع، وفوكوياما فظّع وطمّن الجميع بتنبؤاتو عن نهاية التاريخ مثلاً يا بابا... عيّط للماما لنخبّرها. في شي تاني إذن، وهوّي «توك»، والتوك هوّي المشكل المزمن. بيوازي المرض اللي بيجي باللغة الشعبية: خِلقة. هيدا اللي اعتمدولو إسم مع بداية عهد الكومبيوتر: by default. إيه نعم في توك بالرأسمالية، توك ــ خِلقة، وهوّي ببساطة: برأس المال ما في تنين! وفي حال في تنين يعني عميتنافسو حتّى واحد يسيطر، أي يربح السوق وحدو، وإذا أمكن يكون السوق كلّ الكرة الأرضية، بيكون أفضل!!! هه، هون فعلاً بتعرف شو هوّي أفضل الأفضل، أفضل التفضيل. بعدين مين قال إنّو الفرد عدوّ المجتمع؟ ما هيّي كلّ النظريّات المادية والأديان السماوية، إذا في شي وحيد مشترك بيناتها، هوّي فكرة المجموعة وأهميتها للفرد، الفرد بيحتمي بالمجموعة وهاي طبيعتو. هيدا عكس تمام ما الإعلام الغربي داير يسوّق. ما أساساً كل شي، والبشري ضمناً، حوّلو رأس المال لمنتج (Product). ومتل ما اعتمد بالسياسة والحرب مبدأ فرّق تسد، السلعة عمبيصنعها ويسوّقلها على نفس المبدأ. يعني: بيشقّف المنتج، بيبيعو شقف، وعَ مراحل (شقّف الوقت كمان)... إنّو هيدا المنتج الجديد بيجي بهالطريقة... إنّو في 200 غرام شوكولا ما رح نضلّ فينا نبيعن بنفس الشكل... والنتيجة صارت موجودة بالسوبرماركت: شي بالكدشة، وشي بنص لوح، شي بأكياس، شي مش معقول. هاي بشكل أو بآخر خطة «شقّف تسد» ــ مستعد الرأسمال يوضع الفرد مقابل المجموعة. لاحظوا كيف دايماً المعلن بيخاطب المشاهد ـــ الزبون بصيغة المفرد، وهنّي مليارات عالتالفزيون، وطبعاً بيجلّي بالفرداوية بس يخاطب المرأة. بيخاطبو وبيخاطبها بحميمية حتّى، وبينفخ فين وبقوتن وبشخصيتن وبجمالن اللي هيي أكتر من الباقيين. ليه مين هنّي الباقيين؟ ما هنّي زباين كمان! الغبا فظيع، بس لا بدّ منّو الظاهر. والفرد اللي ما بيتوفّق بمبادرتو الفردية، يعني يللّي بيطحنو السوق من ورا فشلو إجتماعياً، أي بالأساس مالياً/ معيشياً، السوق ما بيتركو. إخترعلو كمّية من الجمعيّات والمؤسسات اللي بتدرلو البزّ قبل ما يبكي ويكفر بالنظام. هيدي هالمؤسسات والمناهج بيطلع فيها لايحة بتطعمي جزء من أفريقيا لو الأموال اللي بتنصرفلها ما بتنصرفلها. بس إنت حبيبي قادر تحكي الـ «يو أس أيد» بهيك فكرة؟ ريتك تسلم لأمّك شو هالشبّ.
الاستنتاج التاني: الشعارات الكلاسيكية التاريخية لرأس المال اللي كان أهمها: الخبرة، العراقة، الأقدمية، وطبعاً المتانة والضَيان، هيدي الشعارات صارت ضد اللي أطلقها، ولسبب بسيط وغير متوقّع خالص، لأنّو رأس المال موصوف بقصر النظر، وليه؟ لأنّو بيجي من العمى الخالص اللي بيصيب الانسان قدّام الربح الكبير، وبالتحديد قدّام منظر تكدّس المصاري. منظر بالنسبة للبعض أهم من الاغراء النسائي، إيه والله... مثال بسيط، وللتذكير، الإشتراكية برّات المنافسة وبرّات التهديد العسكري: إنّو شركة الدودج شو في عندها أو شو في وراها لحتّالي عم بتقلّع هالقد عمّال عبيوتن، وبالألوف، غير الخوف من الخسارة. ومن شو الخسارة؟ من أي سيارة أرخص، حتى لو هالسيارة دودج كمان، بس موديل أرخص من موديل دودج تاني. معقول!!؟ إيه نعم معقول كتير وبدليل كل موديل بطّل يبيع متل قبل، وقّفتو الدودج وبعتت اللي كانوا يشتغلوا فيه عبيوتن بكل رياحة مش ضمير، بكل رياحة صندوق (العولمة) ــ إنّو شو بدا الدودج بالله بسيارة بتبقى عندك شي 15 سنة؟ إنّو هيي بهالوقت شو بتعمل يعني. شو بتبيع كعك بسمسم وألّيطا؟ أو فوط غبرا ومطبخ؟ ولا يمكن طبعاً ــ إنّو قليلة، سيارة إنت صمّمتها وصنّعتها وسوّقتلها وفلقت اللي خلقنا فيها السنة الماضيي، تصير عدوتك إلك السنة؟ وأنا شو بعمل؟... ما إلك رب إنت.
(يتبع)
سياسة
الأخبار - العدد ٢٤٤٨ الأربعاء ١٩ تشرين الثاني ٢٠١٤

18‏/11‏/2014

Тбилиси | Berlin Charlie checkpoint

زياد الرحباني
 
في ببرلين هالأيام احتفالات كبيرة بذكرى سقوط الجدار. على أمل إنّو هاي السنين اللي كانت صعبة على ألمانيا ما بقا ترجع. بمعزل عن إنتمائي أنا اليوم، أكيد لو ما صار بالتاريخ السابق لسقوط الجدار أحداث وممارسات لا تحتمل، ما كان حدا فكّر يسقّط الجدار. وبما إنّو اللي بيصير بالتاريخ حتمي، بدليل صار، وبالتالي ما فينا حتى لو برّرنا الممارسات اللي سبّبت اللي صار، نغيّر بواقع إنّو صار، ما فينا نقول إلا: اللي صار صار، ونضفلها: وخلص. لكن، كمان لازم نلاحظ شو بلّش يصير بالعالم كلّو، الشرقي والغربي المتحالف مع القارّة الأميركية، من بعد سقوط الجدار.
أهم شعارين بترفعهن الرأسمالية واللي هنّي: 1ــ المبادرة الفردية، و2ــ المنافسة في سبيل الأفضل، وصلوا لمشكلة كبيرة عملية. بشكل أوضح، وصلوا لتناقض أساسي داخلي موجود فيهن، خاصة الشعار التاني المتعلّق بالمنافسة، واللي كانت ملغيّي تقريباً بالنظام الاشتراكي لمصلحة مركزية الدولة. إذا رجعنا للمبادرة الفردية، الظاهر إنّو ما عاد إلو لزوم تسويقها بالإعلام الغربي، والأرجح لأنّو أهميتها كانت مربوطة بوجود منظومة إشتراكية كبيرة مؤمنة بمركزية الدولة. فلمّا انهارت، بقيت المبادرة الفردية وحدها بالسوق العالمي (مع استثناءات ببعض الدول) هيّي المتداولة والطبيعية. الكارثة اليوم اللي برأيي رح تنهي الرأسمالية بإذن الله، مش بالمبادرة الفردية بل بـ «المنافسة في سبيل الأفضل». طلعت هيدي «الخبرية» أكبر كذبة أو نكتة عالمية معاصرة. لأنّو تبيّن من التراجع العام والشامل النوعي بكل شي مصنّع لينباع، ناتج عن سبب منّو غير إرادي. بالعكس تماماً، طلعت هيدي المنافسة مش في سبيل الأفضل. طلعت في سبيل الأربح، يعني في سبيل المال الأكتر مش المنتج الأفضل. فهمت يا بابا؟!
الرأسمال، تأكّد يا بابا، الرأسمال متمثّل بالصناعيين الكبار أصحاب المصالح الضخمة الأساسية والمكمّلة والكمالية، كلها دون استثناء، تأكّدوا ببساطة شديدة وبوضوح الشمس إنّو: الأفضل بالنظام التنافسي بيخسّر...! أيوااااااه. إيه ده؟ كارثة. إيه بس لأ مش عالتجار ولا الصناعيين، لأنّو حلّوها دوغري، ما بدها شي: الأفضل = نوعية أكتر = خسارة = ربح أقلّ. هيدا الأفضل بلاه وأخت ساعتو...! ومين قال إنّو الإنسان أي الشاري ضروري ياخد الأفضل، أو إنّو هوّي بيعرف قديش بعد في أفضل. ما نحنا اللي بالإعلام عمنخبرو وندلّو إنّو هيدا هوّي الأفضل. هلق هوّي بيثبت مع الوقت إنو اشترى منتج وخرب عندو أسرع، إنما كان أرخص لأنّو سعرو أقلّ ونوعيتو كمان. بالتالي، هيدا «الأفضل القديم المعهود»، هيدا غير أفضل تبع هلق. هيداك الأفضل القديم واللي الرأسمال سوّقلو وفلقنا سنين بنوعيتو وطول عمرو، مقابل الاشتراكية اللي مهتمة بس بالكمّية على حساب النوعيّة، فطلع بعد خبرة وتجربة الرأسمال بالسوق، إنّو الأفضل المعهود هيداك منّو «الأفضل الحقيقي»، فالأفضل هوّي هيدا هلق، وهيّاه: أرخص وبس بدّك تتخلّى عنّو بترميه، لأنّو رح فيك بسبب رخصو تجيب أفضل وأجدّ منّو. والأجدّ تفصيل مهمّ بالإعلام. وبما إنّو أهم شي إنّو صانع المنتج ما يأفلس أو لا سمح الله يربح أقلّ، من المستحبّ تتراجع النوعيّة، والربح إذا ما قادر يطلع بيستقرّ... ما معقول كمان يكون الأفضل ما بيسوى... بيخسّر لأنو!
(يتبع)
سياسة
الأخبار - العدد ٢٤٤٧ الثلاثاء ١٨ تشرين الثاني ٢٠١٤

15‏/11‏/2014

Тбилиси | سابق عصرك

زياد الرحباني

ــ بتعرف استاذ؟ ما بعرف إذا بتعرف إنك سابق عصرك وزمانك؟
ــ انا؟ يعني شكراً كتير بس لأ حبيبي. على كل حال، انت حر وفيك تحلّل على ذوقك. بس انا بعرف حالي ــ عالقليلة بسبب العمر والتكرار ــ أكتر منك... ممكن ليك، أنا حالياً كون سابق عصري. وعصري طبعاً يعني عصرك، يللا لأ؟
ــ امبلى، العصر الحالي يعني.
ــ أيوه! هيدا العصر حبيبي إنت وانا سابقينو، مش بس انا، سابقينو قد ما هو ماشي بطيء، وانتبه، بيوقّف أوقات، وهيدا شي عجيب، لانو الطبيعة نفسها ولا بتعرف ولا بتقدر تعمل هالشي. في بس نحنا، نحنا يعني: قلّن إنك لبناني. ليه ما بعرف، توصلنا نتقّل حمل على هالعصر، حتى بَطّأ هلقد، لا بل صار يطفي، تصوّر. تصوّر عصر عم يطفي! وإذا بيطفي يعني بيوقف، وتصوّر إنو حتّالي ما نضرّ أي دولة او بلد حوالينا امتداداً للمنطقة العربية ولآسيا، اضطرينا نفصل بعض الوصلات اللي بتوصل عصرنا بالباقيين، ومشينا فيه عادي. وينك؟ لو هيدا العصر قادر يرجع لظروفو العادية متل قبل ما انتكس، يعني يرجع يمشي بسرعتو المعهودة، يعني متل العصر الحالي بالعالم، بيطيحنا بتكّة انا واياك وجمهوريتنا والمغتربين. ولاه نحنا بالأساس إللي أبطأ منّو. شو بتحب نعمل هلق... وصّينا!

سياسة
الأخبار - العدد ٢٤٤٥ السبت ١٥ تشرين الثاني ٢٠١٤

14‏/11‏/2014

Тбилиси | ...

زياد الرحباني

بس يصير بيّاع قادر يدلّك على بيّاع غيرو، ومعظم الأحيان بكون مش كتير بعيد عنو، اذا مش بلزقو وخاصة اذا سألتو عن غرض خالص من عندو، طبعاً من بعد ما قلك: مقطوع هيدا، أو وقّفوه، أو: شركتو بإسبانيا أفلست. وكلّو لأنو هوي بهاللحظة ما عندو منو. لمّا هيّدا البيّاع يصير قادر ببساطة يدلك عا جارو بيّاع تاني عندو هالغرض، وقتها بس ممكن تتحسن أوضاع وشروط إستمرار الرأسمالية. وإنتبه كيف تتحسن يعني؟ متل ما عم قلك، ما عندها غير إتجاه، بدها تتحسن بإتجاه الإشتراكية.
في بياعَين بالإشتراكية، وفيهم ينسقوا البيع، فيهم يصيروا شركة بدكانين، وإذا أوسع تعاونية يمكن، وإذا بعد أوسع... ضيعة مثلاً بإمها وأبوها سهرانة كلها بساحة الضيعة مش بنيّة شي غير السهر وطقّ الحنك والرقص ربما والغناء والسِكِر، إذا الجماعة بيشربوا. يعني حالة هيك عادة ما حدا معقول يكون عندو إعتراض عليها. في امبلى، في المريض بروحو او إلي إشبو شي... طالعلو مثلاً طَمَع بمناخيرو!! إيه طبعاً هيدا بدّو عملية.

■ ■ ■

ــ هنّي ما تعتل همهم، عادوا لقيوا قاسم مشترك لإعادة طرح مفهوم العيش المشترك كمدخل أساسي وعضوي للمصير المشترك لكل المواطنين.
ــ ليك، بما إنو كلو مشترك، منتبه انت كم مشترك طلع معك بهالجملة؟
ــ إيه طبيعي، شو بدك، العيش مشترك، المصير مشترك، القاسم (قاطعو)
ــ ليك والنقل المشترك ليه ما جيت ع سيرتو؟
ــ النقل المشترك؟ هيدا شي تفصيلي منو اساس.
ــ إذا عم تحكي بالأساس أساساً اسمع: بس يزبط ويسري النقل المشترك ويتفشى أكتر بكتير مما هو عليه اليوم، بس يقنع المواطن إنو مش إهانة النقل المشترك، لا بِيْعود بدك لا قاسم، ولا عيش، ولا عايشة، ولا مصير مشترك، ولا رئيس جمهورية عادل وشفاف، ولا جمال نادر وصعب.

سياسة
الأخبار - العدد ٢٤٤٤ الجمعة ١٤ تشرين الثاني ٢٠١٤

13‏/11‏/2014

Тбилиси | يا عين عالموبايل

زياد الرحباني 
 
صحيح، حلو كتير يكون الإنسان عندو، بسبب أعمالو وتاريخ حياتو، رصيد كبير عند الناس. وهيك رصيد عادةً، بيكون عالي كتير وماكن. لأنّو الناس هنّي «الموضوع» (مش الـ LBC). الناس هنّي أهم شي، أي أنهم أقوى شي.
طيب معقول يا ربّي وإلهي، يجي نهار يصير هالرصيد بينعمل بموجبو شيكات مثلاً، مش كتار، إنّو كم شيك بس اللي عاملين «الزنقة» أو الضيقة (إذا أوضح)... ما هنّي هالكمّ شيك لمين؟ لعالم!! لناس من هالناس اللي مفروض إلي عندهن رصيد. ما شو عم نحكي إلنا كذا سطر؟ لأنّو إذا لأ، رح ضلّ عايش بأزمة مالية...
أكيد رصيدي عندهن وجزء منهن إلو معي «كاش»!!! وأنا مش قادر أوصل لرصيدي، فَ رح ضلّ مديون وعندي رصيد كبير عندن. دوّيخة يعني ومنّو شي حساب ضخم لنقول، بس مجمّد ومبعّد عا سويسرا، عا سبيل المثال... لأ، يحّو هون، كلو هون، والمشكلة الأكبر إنّو ما عندي غيرو... يعني إذا أي قارئ قادر يساعدني فكّر بشكل أوضح: ما العمل؟ أنا رح كون كتير ممنونو.
■ ■ ■
في عندي مجموعة من الأوراق مضبوبين. مضبوبين إلهن سنين، ونقلتهن معي من بيت لبيت، وما قادر بمقال واحد خبركن كم بيت هنّي البيوت اللي نقلتهن بهالحرب الأهلية الخلّاقة والمتجددة دوماً... إيه هيدي الأوراق أنا بعرف إني لازم خزّقهن قبل ما موت... بس فزعان خزّقهن وما موت. قليلة ملّا ورطة؟!!... فهاي كمان: ما العمل؟ بخزقهن؟ (كمان أريد حلّاً من القارئ نفسه).
■ ■ ■
أخي المواطن، بدّك تنتبه لأنو الحسنات اللي بيساعدك فيها جهازك الخلوي عالكذب، واللي إنتَ بتعبدو مفهوم، بيجي عا مقابيلها كمّية تركيز وتشغيل راس لتحافظ عالكذبة اللي توفّقت فيها كخطوة أولى، وقطّعتها بالسلامة، مع ابتسامة النصر الهبيلة!!!
يعني إذا قلّك مثلاً: إنتَ وين هلق بالبيت؟ وقلتلو لأ أنا عالطيّونة ــ ما فيك فجأة بآخر الحديث إذا قلّك: طيب لكن خلّيها لبكرا، وين بدّك نلتقي بكرا؟ ــ ما فيك تجاوبو يا «خرندع»: «متل العادة هون»!!! ـــ يعني مطرح ما إنت هلق وعمتكذب... فهمت؟ إنتَ هلق عالطيونة يا محترم، فكيف إذا زدتلها: «منلتقي هون عا رواق وبلا عجقة القهاوي»!!! (يا عين عالموبايل)
سياسة
الأخبار - العدد ٢٤٤٣ الخميس ١٣ تشرين الثاني ٢٠١٤

12‏/11‏/2014

Тбилиси | صاروخ البسّام ــ 1

زياد الرحباني
 
- شو في أسوأ من نقل البيض؟
- نقل البوظة!
- لأ/ أوكي البوظة أكيد مش هيّن نقلها، وهِيِّ مصاقبة أفضل وقت أحياناً، معظم الأحيان الصيف هو النموذجي للبوظة، يا عين، ليك الله كيف بيصير يزبطها، إنو الشغلة وعكسها، أفضل طريقة لتفشل!! فظيعة الطبيعة، عادلة مش عادلة، آخر همومها. من هيك منقول «بدون تفكير»: أمرنا لـ«الله». بعدك معي إميل؟
- إيه
- إيه، أصعب من نقل البوظة بالصيف، نقل الخبر الموثوق عن تلفزيون «الجديد»، هاي أصعب شي بالعالم، مش بالصيف بس، هاي بالكون بتصفّي! إعتبر الـNTV هو Miss Universe المصداقية!!! أيواااااااا... هلق ركز منيح وإنتظر بكرا شو جاييك: ما بتقطع معهن هاي، القبيسي والأمين... ومين ثالثهما؟
- الشيطان؟
- لاء، يا محلى: البسّام!!!!!
- شو هوي البسّام؟
- صاروخ إيراني قيد التطوير، بهل يومين الحزب بيعلن عنو.
■ ■ ■
صفّيت سيارتي قدامو ونزلت، ع أساس فرن مناقيش ع الصاج. طلبت منقوشة وقلت بهالوقت بطلب بيت أهلي بصبّح عليهم، إلي زمان ما حكيتهن. تركتو يعني ما شايفو كيف عم يساويها. خلّص، عيّطلي: يا عم، المنقوشة. أخدتها، دوّرت السيارة ومشيت. كدشت أول كدشة حسيتها قاسية منيح، برمتها وكدشت كدشة من غير زاوية... العمى!! رح كسّر واجهة سناني. إنو ع الصاج، ع راسي، بس هلقد! رجعت لفّيت بالسيارة لعندو، لأنو اساساً السير تلات أرباع واقف، وبعدني قريب ع الفرن. رجعت نزلت لعندو وصاقب بلحظة عم بحاسب واحد وفلّ. - قلتلو: يا عم، تأكدلي انا طلبت منك منقوشة ع الصاج هلق من شوي، ذاكرني؟ - جاوبني: إيه أهلاً خير؟ - جاوبتو: تأكد إنك عطيتني منقوشة! - جاوبني: إيه، أنا مأكد، ما عطيتك ياها ليه؟ - قلتلو: مبلى، بس تأكد إنو منك عاطيني الصاج... شِفْلي بعدو عندك!؟ الله لا يوفقك، ما يكون كل واحد بيطلب من عندك منقوشة بيطلعلو صاج معها.
سياسة
الأخبار - العدد ٢٤٤٢ الاربعاء ١٢ تشرين الثاني ٢٠١٤

11‏/11‏/2014

Тбилиси | ليك وينو

زياد الرحباني 
 
يا ريت تركّز إنتَ يا بني آدم وعبله، يا ريت توفّر جهودك للإكتشاف والإختراع، توفّرها لقصص يكون تغييرها أو تعديلها لصالحَك، لصالح الإنسان يعني. بأميركا فكّروا كتير تاريخياً بالسيّارة. السيّارة مهمّة بأميركا وخلّوها تصير جزء أساسي من خيال وهوس كل مواطن. طبعاً شو بيلحق هالقصص؟ بيلحقها أمن السيّارة من الحوادث أو من السرقة. بهالإطار اكتشفت أكتر من مرّة الدراسات الاجتماعية معطوفة عَا الإحصاءات، حقيقة: أكترية سرّاقين السيّارات هنّي من الأميركان السود.
هلق عا شو بدّك إنو تركّز البحوث بعد هالنتايج؟ إحزر واربح يا بني آدم، إحزر واربح سيّارة لعبله!! لقلّك، ما رح تربح شي، رح تربح «غيري»!!! بعد ما عرفوا البيض مين نسبة السرّاقين الأساسية، ركّزوا دراساتن على كيفية تطوير مواقف السيّارات بالأبنية اللي انبنت من بعد الدراسات. فا شو طلع معن؟ طلع إنو لازم تطلع السيّارة عن الطريق، وتطلع كمان من الطوابق السفلى اللي هيي عادةً مواقف طبيعية، تطلع مع كل مستأجر عا الطابق تبعو. يعني ساكن بالـ 15 صافف بالـ 15... يعني عمبيشغلو راس الحرامي الأسود وخيالو أكتر بعد ليقدر يسرق، عمبيعذبوه بالسرقة... طيب مش أحسن لو ركّز البحث على الوضع الاجتماعي الرديء اللي هوّي وصّلوا يسرق سيّارات؟ واللهِ أحسن للكلّ، لصاحب السيّارة اللي مضطر ينزّلها من الطابق 15 كلّ ما بدو يسوقها، وطبعاً بدو يرجع يطلّعها، وأحسن للسيّارة لأنها عمبتتعرض لكذا ضربة ولكشة لتصير قدّام البيت فوق، وفوق يعني شي عمينطح السحاب، ما تنسوا، وأكيد أحسن للسرّاق لأنو اذا صار وضعوا الاجتماعي مقبول أو حتى شوي أفضل، مفروض ما يعود يفكّر يسرق ولا يغامر بحياتو هوّي وعميسرق وبعد ما يسرق، لأنو ما تنسوا السرقة ممنوعة بالأساس، وفي بوليس بالمجتمع وفي حبس، وأكيد بلاهن أحسن. بس: فظيعة أميركا!!! جدّ، وأفظع منها العربان المدهوشين.
■ ■ ■
تذكّرت شي. شفتَك هيداك النهار إنتَ وهيدي المرا اللي بتشتغل بالهندسة الداخلية
(Interior design) لشقتك اللي إستأجرتها جديد. وكنتوا عمتجرّبوا تلاقوا محل خصوصي بالشقّة للمفاتيح. محلّ يكون نموذجي حتالي لا يضيعوا ولا ينتسوا. وقاعدة الست عندك بالصالون عمترسم وتفرجيك صور عا اللابتوب لشقق وحيطان ورفوف... ليك وينك؟ انشالله ما يكون عجبك شي لأنّو بتكون كسبت نفسك. إنّو وين في محلّ أحسن من حدّ الباب الرئيسي إنتَ وفايت أو ضاهر من البيت لتحطّ فيه المفاتيح؟! ليك... ما في، ولا في! ليه! لأنو هيدا الباب إي! وهيدا المفتاح ليك وينو... وينو؟ ليك وينو، حدّ الباب. يعني إذا نسيت مفتاحك وينو، يعني أصول تنسى كمان الباب وين!!!!!
سياسة
الأخبار - العدد ٢٤٤١ الثلاثاء ١١ تشرين الثاني ٢٠١٤

10‏/11‏/2014

Тбилиси | NASA… one second please

زياد الرحباني 
 
سؤال: وِعِي بلا وَعِي!!! طفى المنبّه اللي عم بيدق بوحشنة وثبات، ورجع نام. هاي الشغلة كيف؟... كيف هاي؟ هل ممكن لوكالة الناسا توقّف نهار واحد بحوثها المتعلقة بالبخش الأسود أو بالبيغ بانغ (Big bang) وتجاوبنا كيف وِعِي هيدا بلا وَعِي ورجع نام؟ وشكراً سلفاً.
■ ■ ■
سؤال: أعرف أنكم (أي في الناسا) تراقبون ــ كما تراقبون الفضاء ليل نهار ــ من حين لآخر، كوكب الأرض. وهذا بديهي طالما أن عليه: الكثيرَ من الصينيين وبعضاً من الروس، هذا عدا عن الإيرانيين والكوريين الشماليين وتلك الحفنة من الألمان إلخ... هل لكم أن تفسروا لي ظاهرة يومية تحدث مع الإنسان، أي إنسان، أميركي، بوليفي، قطري إلخ... فسّروا لي كيف يطلب الإنسان أن يكون كرسي الحمّام بمنتهى النظافة، واكثر من ذلك، يفضّل البعض أن يروا فيه شيئاً من اللمعة للتأكّد من قرب تاريخ مسحه، وكل ذلك حتى يجلس عليه ويفرغ كل خراه؟
وهل يفيدكم هذا السؤال في اكتشاف التناقض المهول «الكامل»، أي بزاوية 360 درجة الذي يتكوّن منه «بني آدم»؟
■ ■ ■
السؤال الأخير هنا لدولة رئيس الحكومة السابق حضرة الأستاذ فؤاد السنيورة: (محكي) كيف معقول ترجع تمشي وتزدهر منطقة سوليدير، إذا فرن مناقيش واحد ما فيها؟
سياسة
الأخبار - العدد ٢٤٤٠ الاثنين ١٠ تشرين الثاني ٢٠١٤

08‏/11‏/2014

Тбилиси | قوم عن التلفزيون

زياد الرحباني 
 
فيك تجلّس شوي أنا وعم بحكيك. إي هيك أفضل... عم بسألك سؤال عن الغبرا... وردة فعلك متل العادة، مفتكر إني عم بحكيك بإشيا «سفسطة»، يعني بإشيا بس بالحكي بتبيّن إلها معنى، وهيي حكي أو لعب عالحكي أو بالحكي بدون معنى... إنتَ مستعد تتهمّ هيك حديث بأي شي، بس لََمَا تشيل عينك لحظة عن التلفزيون وعن ليلى عبد اللطيف بهاللحظة... ولاه معقول إنتَ وليلى وعبد اللطيف والشيخ اللي زتّها عالهوا كل أسبوع عاتلفزيون منشاف وعندو «هوا» لإلو... وسعّر هالهوا بشكل كتير غالي عالإنسان العادي... يعني هاي المخلوقة شبه فرض عليك وعلييّ...
إي طبعاً... إنتَ نفسَك قلتلي إنها مش عمتعرف تقرا التوقعات اللي كاتبينلها اياهن، وهيي معظم الأحيان مش توقعات، هيي معلومات من مصادرها اللي قادرة تخططلنا إيامنا الجايي عافترة... يا أعرابي يا واد يا تقيل. إنو اللي باعت مجموعات داعش عأ بقعة بالعراق، من الطبيعي يعرف شو رح يصير بكرا، نهار اللي رح يظهروا ويستعرضوا قواتهن، قبلك وقبلي... وإذا خبّر ليلى عبد اللطيف قبل، بتكون المخلوقة ناطقة بإسمو مش بصّارة، وإنتَ مصرّ عالاعجاب بالتبصير... وبس المسا طُلّ أنا صوبك، بتصير تسبّ عبد اللطيف وعبد المولى وعبد المجيد لتخلص منّي... وطّي التلفزيون لحظة انقبر... أيوه... من الأوّل... عم قلّك شي مهم، ولازم تفكّر فيه: كيف لحتّى الغبرا فيها تطير قدّ ما بدّك وبلا جوانح طبعاً... أيّا جوانح... الغبرا نقاط، بقايا شي أو إشيا كتيره، وما بتنشاف قدّ ما صغيرة، ما بتنشاف إلا بصيغة الجمع... موافق؟ طيب... هلق فكّرت شي مرّة ليش بس تغطّ هالغبرا على شي معيّن ما بتعود تعرف تقوم ولا تزيح وأكيد مش تطير وبتصير تكتر وتبيّن، أساساً هيي لتبيّن بيكون صرلها زمان غطّت... ما بتعرف اي رح قلّك: الغبرا أصول تضلّ طايرة، لكن بتغطّ بس عالشي الجامد وما عم يتحرّك... كمان ما ملاحظ هالشي... إي عامهلك. إي شفت، إنتَ مثلاً إنتَ وهالكنباية اللي مخيّم عليها إنتَ بوجّ التلفزيون، بتقدر بسهولة تغطّ عليكن الغبرا... لأنكن بدون حركة... شفت ليش إنتَ والكنباية بتحبّكن الغبرا، متل ما بتحبّ التلفزيون... كل النسوان بيعرفوا إنو الغبرا بتعيّد من الفرح بشاشة التلفزيون نفسو لأنو نوع من مغناطيس بيسحبها للغبرا... أنا عم قلك، مش أنا، حركة التاريخ أكيد مش أنا وحدي، أنا عم عيد... مين أنا وحدي؟ مين؟! مين أيّا واحد وحدو؟ مين كل واحد وحدو؟ ولا شي... يعني مش كل واحد، كلنا واحد فهمت... إي عال... كلنا عم نقلك: قوم عن التلفزيون...
سياسة
الأخبار - العدد ٢٤٣٩ السبت ٨ تشرين الثاني ٢٠١٤

07‏/11‏/2014

Тбилиси | أكيد مفاجِئة

زياد الرحباني
كان من الطبيعي بعد أحداث 11 أيلول والتي هي، للتذكير عام 2001. لمَ التذكير؟ لأنه وبقدْر ما كان وَقْعُ المبنَيَيْن على الأرض ووَقْعُهما على باقي الأرض الكروية كأن التاريخ يُكتَب من الجديد، بقدْر ما كان جديداً ومهولاً (وهو ما يسبب هذا الشرح الملبَّك والطويل) اختفت السنة وسط هذا الركام، فكانت عبارة 11 أيلول الساعة حوالي التاسعة تختصر الموضوع بأكمله.
كنتُ بدأت باستعمال كلمة «من الطبيعي» وها أنا أعود إليها بعد جملتَين اعتراضيتَين — صار من الطبيعي والمقبول والمحق كل ما يخطر ببال تمثال الحرية. كل ما يخطر ببال هذا الراعي للأبقار الرابض خيله إلى جانب التمثال، هُم مَن في تاريخهم القصير والبلا أصل، هُم مَن يبدأ الإهانة ومحاولة استعباد البشر كائناً من كانوا: أعداء، أصدقاء، نيران صديقة،… ماذا جرى حتى يُهاجَموا هُم وصباحاً وفي عُقر وعُقم دارهم؟ إن التاريخ يجب أن يُكتَب من هذه اللحظة. هكذا شعروا وتصرّفوا. وما زاد الطين بلّة أن الاعتداء على المبنَيَيْن مرَكّبٌ جداً ومنظّمٌ أيضاً، لدرجةٍ أنهم وكالعادة البوليسية الدائمة المرافقة للأحداث المشبوهة، وَجَدوا بعد الاعتداء منهجاً لتعليم قيادة طائرة Jet وإلى جانبه قرآناً خلَنْجاً (جديداً)… آآهاهاهاهااااا… وبدأ الفيلم. طبعاً من نافل القول إنهم استَكْلَبوا، أيّ المرحلة التي تلي: استَفْحَل أمرهم فاستَشْرَسوا… فقد «طاب الموت يا عرب»، قالها مسؤول أو ناطق باسم البيت الأبيض، لا أتذكر، وعواميد البنتاغون وراء رقبته، حتى لا ينسى، وحتى يدخلوا في لا وَعيِه أيضاً. «طاب الموت يا عرب» وجرّت وراءها القرارات ـــ الويلات، قرارات تمرّ في طريقها على مجلس الأمن، لست أدري لماذا، وكأنها استراحة صور. إلى أفغانستان، إلى باكستان يا عرَب، إلى إقليم بيشاور وجبال تورا بورا… وانهارت دفاعات طالبان الأساسية وتاه القوم المجاهدون كالمعهود، في الوديان والمغاور. حتى تنظيم القاعدة ـــ الأفغان العرب، تضاربت حوله الروايات، وما إن شعر رعاة البقر أنهم فشّوا خلقهم في الوديان والمساحات المجهولة وبعددٍ لا بأس به من القبائل الموالية لكارضاي العظيم أو المناهضة له، وما الفرق؟ فقد كانوا دوماً يؤمنون أنه «ماكو فرق!» (وقد تعلموها من حرب العراق الأولى في العام 1991) كلهم عرب وكلهم بحَسَب اليهود ممكن أن يكونوا غير موجودين. وهذا لن يؤثر إلا على بعض معاهدات جنيف والصليب الأحمر العادي وبعض المؤسّسات الإنسانية كـ «هيومن رايتس ووتش» (إنكليترا)… وهذا غير مكلف أيضاً، فصناديق الزكاة المنتشرة على جميع مداخل المؤسّسات التجارية الوهّابية في مساحات لا بأس بها من الوطن العربي المنحلّ، تضاف إليها نخوة بعض الأمراء «الأفراد» كما يوَدّ البنتاغون إشاعته لزيادة الغموض في موضوع هياج التطرّف السني المفاجئ، الفيلم البوليسي نفسه ويلزمه عناصر مشوّقة دائمة ليظل مقنعاً (أنظر تعابير وجه الرئيس هولاند كلّما طلبهم للاجتماع كيري، وعين الله ترعاهم، وإن لم يأتوا قُتِل الفرنسي المخطوف أينما كان، في الضاحية الجنوبية أم في تيزي أوزو، إلخ…) وهو رغم كل هذا الجهد لم يُقنِع أحداً! ولا مشكلة عند رعاة البقر، فهُم يضحكون وقد يضربون يدهم بيدك ويقولون Yes!!! لقد كشفتني هاهاهاها… Cool***
لقد كانت ولم تزل أهم وسيلة منذ 11 أيلول للتذكير بها هي: الصورة. الصورة التي لم يسأل الكثيرون كيف كانت بهذا الوضوح ومأخوذة من زاوية نموذجية وهي ليست بصورة لهاوٍ ولا لجماعة «كل مواطن مراسل» (أي بهاتف ذكي أو غبي). لقد صُوِّر انهيار المبنى الأول للحظات كافية قبل اختراق الطائرة الأولى للبرج يا جماعة. Fuck off Afghanistan، هيّا إلى العراق، لقد عاد هذا الأزعر إلى أسلحة الدمار الشامل، إن صدّام لا يُترَك وحده للحظة، فهو أزعر وعنيد. سهلة هذه التركيبة للدخول إلى العراق، فبين تمثال الحرية والعراق تاريخ من معامل حليب الأطفال إلى الأنتراكس إلى النفط مقابل الغذاء إلى موت الأطفال من قلة الماء. وبخلاف التصويت على أفغانستان في مجلس الأمن، الذي كان مسهّلاً، تعقّد وقتها الإجماع على دخول العراق وذلك لشدّة وضوح كذبة اتهام النظام العراقي بأسلحة الدمار الشامل، لكن ضمير أميركا وقتها لم يسمح بالرضوح لهذا الخنوع العالمي، فدخلت العراق بمفردها، وبعد فترة من المقاومة الغامضة جاء اليوم المركزي حيث تمّ نقل «وودستوك» إلى ساحة الفردوس وخيَّم الجميع حتى وصلت كل التلفزيونات ووكالات الأنباء وبدأ الاقتصاص من أحد تماثيل الطاغية صدّام وذلك بجميع الوسائل: من الملالة، الحبل، الصندل، البصقة إلى المتسلّقين… وبقي من كل هذا الضجيج، مرّة أخرى: الصورة. إن الصورة مهمة جداً في حروب اليوم، لأن إقتصاد السوق الرأسمالي مستعد أن يحوّل أي شيء إلى Logo وما أدراكم ما الـLogo. إن اللوغو جزء من الإعلان، قد يكون «أجيال تنمو مع نيدو» و»ما تخلّوا الولد يلعب ويجرح إيدو». هذا هو جزّار حلبجة وسفّاح النجف وهولاكو البصرة البعثي العراقي تحت لوغو تمثال ساحة الفردوس.
(محكي) طيب؟ وليه بقا بعد كل هالإنجازات العسكرية والأمنية والديمقراطية، كلّما بدّو يزور مسؤول أميركاني أو أوروبي حليف، أفغانستان أو العراق بيقولولك: وَصَل اليوم الرئيس هولاند بصورةٍ مفاجِئة إلى قاعدة باغرام في أفغانستان أو إلى مطار بغداد، لا فرق. إنو ليه بعدهن بيوصلوا بصورةٍ مفاجِئة؟ لأنو لا المالكي ولا كارضاي، مش عاملين شييييي… ليش هنّي خلّولهن جيوش ليعملوا شي؟؟ صاير كارضاي بتفكّروا hostess!
***خرا
سياسة
الأخبار - العدد ٢٤٣٨ الجمعة ٧ تشرين الثاني ٢٠١٤

04‏/11‏/2014

خرجكن

زياد الرحباني 
 
كلنا، نحنا المواطنين، نحنا عباد الله الصابر الرحوم، لما يغلّق معنا فَهم حياتنا اليومية ومن زمان، ودغري نستقرب، وبالتالي دغري نستشهد بالمقولة الشهيرة «كما تَكونوا يولّى عليكم»، منكون طبعاً بمعرض الحديث عن زعاماتنا عموماً، لأ حصراً. طيّب ما هو هون مشكلتنا، رجعنا! نحنا المواطنين، نحنا العباد الغير صالحين، هاي نحنا! وما بيكفي إنو نحنا أساس المشكلة الكبرى بالوضع القائم إلو سنين، كمان لمّا نحاول نحلّل الوضع، منغشّ، منزعبر، مِنْحرّف. ولاه؟ ما الجملة من شقفتين: «كما تكونوا» واحدة، و»يُولّى عليكم» واحدة تانية.
الجملة هي عرض ــ استنتاج. إنو وين رايحين بـ»كما تكونوا»، إي؟ إنو شو هيي الجملة «يُولّى عليكم» بس؟ كتير هيك. هالوقاحة كمان، بالتأويل وبالتفسير، تعوا لهون، حاكوني، «كما تكونوا» عم بيقلّكن، انتو ما منتبهين ع حالكن انتو كيف ووين وشو؟
خرجكن ولاه، خرجكن يشغّلكن هيك معلّم، خرجكن تغنيلكن هيك مطربة، خرجكن يوقّفكنم هيك دركي، خرجكن تتعذّبوا هلقد بالنافعة، او بالضهرة المستحيلة من الباركينغ، خرجكن هيك بهدلة بهيك مستشفيات مع هيك أطبّا أو لحّامين بلا أخلاق وتجار، ما هيك بتحسّوهن؟ إي وهنّي هيك. خرجكن يطلعلكن هيك خبز، ويطلعلكن إشيا بالخبز، وهيك لبنة وهيك مَيْ! مَيْ يا إلهي، مَيْ يا إلهي لماذا تركتني؟ خرجكن هيك سواقة سيارات، مدرسة بسواقة السيارات، ما في منهج سواقة بالعالم بيشبهها، لا باليونان ولا بالإمارات. بالنهاية، خرجكن هيك مواطنين، إي شو يعني؟ إنو المواطنين مين هنّي؟ انتو شو ليه بالله؟ إنو انتو كلكن كمواطنين ما دخّلكن بهيك مواطنين؟! كيف هاي؟ وهاي ما في منها إلا عندكن وفيكن. وبالعربي الأفصح: كل ما «تَكونوا» هيك، رح يضلّوا هيك «يُوَلّى عليكم». وأساساً أظن إنو هيك مواطنين بهيك مواصفات، ما لازم «يُوَلّى عليهم» إلا هيك. والدليل، هيدا اللي حاصل.
■ ■ ■
ساطع
ــ ما هو حسب ميزانيتك، إذا ما في مصاري قد ما مطلوب بالبداية، بلا الجريدة الورقية، طلّع وحدة بس إلكترونية.
ــ وحدة إلكترونية بس؟ معقول؟
ــ إيه، وحدّة عربية إشتراكية إلكترونية. شو بدّك أحلى من هيك، شوف ساطع شو عامل.
سياسة
الأخبار - العدد ٢٤٣٦ الثلاثاء ٤ تشرين الثاني ٢٠١٤

03‏/11‏/2014

أنا تعبت

زياد الرحباني 
 
ليكي، إذا فعلاً هل قد بتحبِّيني، وشي ما عم يتقدَّر صح ولا عم ينعطى قيمتو، او ما عم يتقدّر بـ... تكافؤ... يعني شي، الإنماء لو دخلّو، صعبة يضلّ متوازن، يعني كأنك عم تقولي: في إجحاف بحق حبِّك لألي واللي صار هلق مُزمن... برأيي صار لازم هاي شغلة، تنقال بالأخبار! لازم تنزل بالصحف، وعالفايس بوك هيدي ما بدها سؤال: قدِّي رولا بتحبو لزياد... صدقيني هاي اذا وزير الثقافة بيعطيني موعد... هاي شغلة فيها، مش فيها، ضروري تتدرّس بالإبتدائي...
لازم هيدا الجيل الصاعد اللي منشوفو نحنا «بلا مخ» عموماً لأنو ما حدا عم يرشدو، ما حدا فاضيلو، خاصة مع انحلال الدولة الشامل، مين فاضي للعلم، للطلاب اليافعين اللي العلم في الصغر كالنقش في الحجر بيعنيهم هني بالذات؟...
رولا انتِ لهلق: شهيدة. انتِ الجندي المجهول. لأ أكثر، صراحةً، انتِ الجندي المهبول!!...
أكيد،... كيف بعدك معي، ولو من بعيد لبعيد، كيف بعدك بتحبيني وهلقد، هيدا مش مقبول... أوكي؟ عفيني دخيلك انا تعبت!
■ ■ ■
رَكَضَ عَامِلٌ مَصْرِيٌّ يَعَملُ في فُرنِ ومطعم «يمين» الذي يفتح 24 ساعة في النهار ــ فرع الرابية ــ فظننت انه يريد أن يساعدني في حمل اكياسي الى السيارة فقلت له: خلص خلص شُكراً مِشِي الحال... فبادرني بالجواب:
لا لا... العفو استاذ، ممكن اسألك سؤال لو سمحت؟
فجاوبته: أكيد تفضل
قال: «هُوَّ» مين كان يغني بالظبط قبلِ فيروز؟***
*** فعلاً، حلِّل وناقش.
سياسة
الأخبار - العدد ٢٤٣٥ الاثنين ٣ تشرين الثاني ٢٠١٤

01‏/11‏/2014

متفرقات 4

زياد الرحباني 
ــ منيح اللي كل اللي عم بيهَرْهِر منّك لوبية!
ــ لي شو فيها؟
ــ لأنو تلّيت الدني يا خرا!
■ ■ ■
قَرَطْني «الصوت»... اشتغلت فيه لهلق 40 سنة، وولا مرة قدرت شفتو... كتير بيشبه الله.
■ ■ ■
يعني بِشَرَفي مرا ختيارة ختيارة ختيارة، والحَلَق اللي حاطِطّو مظبّط لدرجة، ورابطة شعرها والـ satin «ستَان» ساقط مطرح ما لازم، والخواتم بأيديها وقميص بيضا حرير ولونها نبيذي، وحمرة عا شفافها وطيْبة طيْبة، هيك بتحسها... كيف بدي قلّك؟...
بتندفن مِتِل ما هيي!!!
■ ■ ■
من راس النبع لعين التينة، ولا شي إذا السير مسهّل وحتى فيك عا طريقك تسلك عن طريق ساقية الجنزير... يا زلمة ليه هالأسامي كأنو بعدو بالبرية الواحد لا بالعاصمة وَلَا مين يحزنون.
■ ■ ■
الحب الأعمى أنا بقلك شو هوي هيدا الحب... هيدا أوضة كانت مشعشعة بالليل وفجأة انقطعت عنها الكهربا... هلق مش أول لحظة أكيد، بس شوي شوي، بيصير «بوبو» عينك يوسع لتشوف بالعتمة، وبتبلش تقشع تدريجياً غرض ورا غرض، لترجع تشوفها للأوضة كلها.
وساعتها البكاء وَصَرِير الأسنان!
■ ■ ■
ليك، أنيس! إذا شغلة بدَّك تخلصْها بسرعة، أحَدْ أبسط الطرق وأسرعها، هيي إنك تقوم وتبلشها بسرعة، مش إنو بس بسرعة، هلق... فوراً... أوكي أنيس؟!
سياسة
الأخبار - العدد ٢٤٣٤ السبت ١ تشرين الثاني ٢٠١٤